Butunjahon shaxmat Olimpiadasining birinchi kunida oʻzbekistonliklar peshqadam boʻldi

"Musobaqa 22 sentabrga qadar boʻlib oʻtadi. Uning Open dasturida 193 ta, ayollar oʻrtasida esa 181 ta jamoa qatnashadi. Shuningdek, musobaqa jami shveytsarcha shaklda 11 ta turdan iborat boʻladi", deya qayd etilgan xabarda.

Bellashuvda Oʻzbekiston erkaklar terma jamoasidan Nodirbek Abdusattorov, Javohir Sindarov, Nodirbek Yakubboyev, Shamsiddin Vohidov hamda Jahongir Vahidovlar qatnashadi. Qizlar terma jamoasidan esa Afruza Hamdamova, Nilufar Yakubboyeva, Umida Omonova, Marjona Malikova va Nodira Nodirjonova ishtirok etadi. 

Kecha boʻlib oʻtgan bahslarda Oʻzbekiston yigitlar terma jamoasi Trinidad va Tobago Respublikasining yigitlar terma jamoasi bilan belashdi. Unda Nodirbek Abdusattorov raqibi Johnson Joshuani, Shamsiddin Vohidov raqibi Cupid Kevinni hamda Jahongir Vahidov raqibi Harper Ryanni 1:0 natija bilan magʻlub etdi. Nodirbek Yakubboyev esa raqibi Cabralis Quinn bilan durrang natijani qayd etib, birinchi turni 0,5:0,5 hisobi bilan yakunladi. Umumiy natijaga koʻra, Oʻzbekiston yigitlar terma jamoasi Trinidad va Tobago Respublikasining yigitlar terma jamoasini 3,5:0,5 hisobida yengdi. 

Qizlar terma jamoasi esa Gaiti Respublikasining qizlar terma jamoasi bilan kuch sinashadi. Unda Oʻzbekiston terma jamoasidagi barcha qizlar raqiblarini 1:0 hisobida magʻlub etdi. Umumiy natijaga koʻra, Oʻzbekiston qizlar terma jamoasi Gaiti Respublikasining qizlar terma jamoasini 4:0 hisobida yengdi. 

Maʼlumot uchun, Hindistonda boʻlib oʻtgan 44-Butunjahon shaxmat Olimpiadasida Oʻzbekiston yigitlar terma jamoasi chempion boʻlgan edi.