Parij-2024: Bitta oltin, ikkita kumush va bitta bronza medali egallandi

Ortda qolgan kunda Paralimpiya oʻyinlarida yengil atletika boʻyicha oʻzbekistonlik sportchilar ishtirokini boshlab bergan, erkaklar oʻrtasidagi (T12 klassi) uzunlikka sakrash bahslarida qatnashgan sportchi Doniyor Saliyev 7,16 metr natija bilan kumush medalga sazovor boʻldi. Rio-2016 yozgi Paralimpiya oʻyinlarida Saliyev bronza medalini qoʻlga kiritgan edi. 

Yana bir para yengil atletikachi Nurxon Qurbonova Paralimpiya oʻyinlaridagi uchinchi medaliga sazovor boʻldi. Yadro uloqtirish dasturida (F54 klassi) ishtirok etgan sportchi 7,75 metr natija qayd etib, bronza medaliga ega chiqdi. 

Oʻzbekiston sharafini himoya qilayotgan yana bir para yengil atletikachi Boburjon Omonov navbatdagi oltin medalni qoʻlga kiritdi. Yadro uloqtirish (F41 klassi) bellashuvlarida ishtirok etgan Omomov 14,32 metr natija qayd etib, Tokio-2020 yozgi Paralimpiya oʻyinlarida oʻzi oʻrnatgan rekordni yangilashga erishdi. 

Bundan tashqari, uzunlikka sakrash boʻyicha Paralimpiya rekordini oʻrnatgan Asila Mirzayorova bu gal 100 metr masofaga yugurish sport turining saralash bahslarida (T11 klassi) qatnashdi. Asila Mirzayorova saralash bosqichida 13,08 soniya natija qayd etdi. Ushbu koʻrsatgich sportchining finalga chiqishi uchun yetarli boʻlmadi. Ammo bir necha kun oldin Asila Mirzayorova uzunlikka sakrash bahslarida 5,24 metr natija qayd etib, oltin medalni qoʻlga kiritgan edi. 

Para yengil atletika boʻyicha erkaklar oʻrtasida uzunlikka sakrash bahslari (T36 klassi) ham oʻz yakuniga yetdi. Ushbu yoʻnalishda qatnashgan Izzat Turgʻunov 5,58 metr natija qayd etib, sakkizinchi oʻrin bilan ishtirokini yakunladi. 

Erkaklar oʻrtasida 50 metr masofaga erkin usulda suzish boʻyicha final yoʻllanmasini qoʻlga kiritgan Oʻzbekiston terma jamoasining ikki nafar aʼzosi — Islam Aslanov hamda Muzaffar Tursunxoʻjayev marraga beshinchi va oltinchi oʻrinda yetib keldi. 

Shu tariqa kechagi kun bahslari oʻz yakuniga yetdi. Unda Oʻzbekiston delegatsiyasi vakillari terma jamoa hisobiga 1 ta oltin, 2 ta kumush va 1 ta bronza medallarini qoʻshib qoʻydi. Hozirda Paralimpiya medallar reytingida Oʻzbekiston 6 ta oltin, 4 ta kumush va 4 ta bronza, jami 14 ta medal bilan 9-oʻrinni egallab turibdi.