Parij-2024: Bugun 10 nafar oʻzbekistonlik paralimpiyachilar bellashadi

Dastlab erkaklar oʻrtasida para velosport S2 klassida Gʻolibbek Mirzayorov ishtirokini boshlaydi. Uning bahsi Toshkent vaqti bilan soat 11:27 da start oladi. 

Soat 12:30 da para oʻq otish bahslari boshlanadi. Unda Oʻzbekiston delegatsiyasining ikki nafar aʼzosi ishtirok etadi. Para oʻq otish doirasida (P4 klassi) 50 metrli masofadan toʻpponchadan oʻq otish bellashuvlarida Server Ibragimov va Shahnoza Mamajonovalar medallar uchun kurashadi. Shu bilan bir vaqtda erkaklar oʻrtasida 100 metrga erkin para suzish (S12 klassi) bahsi boshlanadi. Bu yoʻnalishda para suzuvchi Dmitriy Xorlin terma jamoa sharafini himoya qiladi.

Shundan soʻng para yengil atletika oʻyinlari ham boʻlib oʻtadi. Ayollar oʻrtasida para disk uloqtirishda (F41 klassi) Kubaro Hakimova hamda Madina Muxtorova Toshkent vaqti bilan soat 13:00 da bahslarga kirishadi.

Bungun erkaklar oʻrtasida 100 metrga yugurish (T11 klassi) Urganch Egamnazarov oʻz omadini sinab koʻradi. Soat 14:47 da ayollar oʻrtasida yadro uloqtirish sportining F46 klassida terma jamoaning ikki nafar vakilasi — Roziya Ergasheva va Shaxina Yigitaliyevalar ishtirok etadi.

Kun bellashuvlarini Azimbek Abdullayevning chiqishi yakunlab beradi. Erkaklar oʻrtasida para velosport (S5 klassi) oʻyinlari boʻlib oʻtadi. Azimbek Abdullayev soat 16:51 dagi oʻyinlarda qatnashadi.