Parij-2024: Paralimpiya oʻyinlarida Oʻzbekiston hisobiga 3 ta medal qoʻshildi

Dastlab K44 klassining -80 kg vazn toifasida ishtirok etgan para taekvondochi Asadbek Toshtemirov final jangini oʻtkazdi. Unga bu bosqichda meksikalik Luis Naxera raqib boʻldi. Asadbek Toshtemirov final jangida raqibiga hech qanday imkoniyat qoldirmadi va yakunda oltin medalni qoʻlga kiritdi.

Oʻzbekiston delegatsiyasining yana bir mahoratli para taekvondochisi Guljanoy Naimova esa Paralimpiya oʻyinlaridagi ikkinchi medalini qoʻlga kiritdi. K44 klassida +65 kg vazn toifasida qatnashgan sportchi finalda britaniyalik Emi Tryusdeylga qarshi chempionlik jangini oʻtkazdi. Oltin medal uchun kechgan bahsda jarohat sabab Guljanoy Naimova jangni oxirigacha yakunlay olmadi va kumush medal sohibi boʻldi. U Tokio-2020 yozgi Paralimpiya oʻyinlarida u oltin medalni qoʻlga kiritgan edi. 

Para yengil atletika boʻyicha F57 klassining nayza uloqtirish bahslarida ishtirok etgan Oʻzbekiston vakili Yorqinbek Odilov oltin medalga sazovor boʻldi. Tokio-2020 yozgi Paralimpiya oʻyinlarini toʻrtinchi oʻrinda yakunlagan Yorqinbek Odilov Parijda 50,32 metr natija koʻrsatdi va unga bu natija oltin medal uchun yetarli boʻldi. 

Bu natijalar orqali Parij-2024 Paralimpiyasida Oʻzbekiston delegatsiyasi hisobidagi medallar soni 11 taga yetdi. Ularning 5 tasi oltin, 3 tasi kumush va qolgan 3 tasi bronzani tashkil etmoqda.