Tadbirkorlik loyihalarini moliyaviy qoʻllab-quvvatlash kengaytiriladi

2026-2027 yillarda Tadbirkorlikni rivojlantirish kompaniyasi tomonidan 5 ming tadbirkorlik loyihasiga 4 trln soʻm miqdorida moliyaviy qoʻllab-quvvatlash taqdim etiladi.

2025 yil 1 noyabrdan boshlab quyidagilarni nazarda tutuvchi qoʻshimcha instrumentlar joriy etiladi:

tadbirkorlik subʼektlarini "chempion" tadbirkor toifasiga olib chiqishga koʻmaklashish uchun ishlab chiqarish va xizmat koʻrsatish sohasidagi loyihalarga milliy va xorijiy valyutada 10 mlrd soʻmgacha kreditlar ajratish uchun banklar orqali resurslar joylashtirish;

banklar tomonidan kichik tadbirkorlik subʼektlarining ishlab chiqarish, xizmat koʻrsatish va "yashil" iqtisodiyot yoʻnalishidagi mikroloyihalariga ajratilgan 500 mln soʻmgacha kreditlarni quyidagi shartlarda qayta moliyalashtirish:

– ajratilgan kreditning foiz stavkasini 6 foizgacha, lekin Markaziy bank asosiy stavkasidan 4 foizlik punkt yuqori stavkagacha pasaytirish;

– kamida 1 yil faoliyat yuritgan va 2 nafar xodimi boʻlgan, 5 va undan ortiq yangi ish oʻrinlarini yaratishni nazarda tutgan tadbirkorlik subʼektlarining loyihalariga taqdim etish.

Tadbirkorlikni rivojlantirish kompaniyasining kafolat va kafillik taqdim etish tizimini xalqaro standartlarga moslashtirish uchun uning muassisligida aksiyadorlik jamiyati shaklida kafolatlar berish tashkiloti tashkil etiladi.

2026 yil 1 yanvardan boshlab Kompaniya uzoq va borish qiyin hududlarda roʻyxatdan oʻtgan kichik va oʻrta tadbirkorlik subʼektlariga ajratilgan kreditlarni mos ravishda 1,5 va 5 mlrd soʻmgacha Markaziy bank asosiy stavkasidan toʻrt foizlik punkt yuqori stavkasigacha qayta moliyalashtirish yoʻli bilan kompensatsiyalar taqdim etadi. Bunda:

qayta moliyalashtirish tadbirkorlik subʼektlarida band boʻlgan xodimlardan Kambagʻal oilalar reyestriga kiritilgan oilalar aʼzolari kamida:

- 5 nafarni tashkil qilganda – 2 foizgacha;

- 10 nafarni tashkil qilganda – 4 foizgacha;

- 20 nafarni tashkil qilganda – 6 foizgacha amalga oshiriladi.

Bundan tashqari, biznes-reja va loyihalarning samaradorlik koʻrsatkichlari past boʻlganda toʻxtatilgan moliyaviy yordamni Iqtisodiyot va moliya vazirligi hamda tarmoq uyushmalari tomonidan belgilangan yoʻnalishlar boʻyicha tiklash huquqi beriladi.

Kompaniya 2026-2028 yillarda 500 mlrd soʻm miqdorida korporativ obligatsiyalar chiqaradi.

Iqtisodiyot va moliya vazirligi 2026 yildan boshlab har yili Kompaniyaga uning buyurtmasiga koʻra "qayta moliyalashtirish" va "resurs joylashtirish" instrumentlari uchun 7 yil muddatga, 3 yillik imtiyozli davrni oʻz ichiga olgan holda, Markaziy bank asosiy stavkasidan 2 foiz punktga past stavkada 300 mlrd soʻmgacha byudjet ssudasini ajratadi.

2026 yil 1 yanvarga qadar Kompaniyaning "Tadbirkor" axborot tizimi tashkilotlarning (roʻyxat boʻyicha) axborot tizimlari bilan integratsiya qilinadi.

Tadbirkorlik faoliyatini moliyaviy qoʻllab-quvvatlashni kengaytirish boʻyicha "Yoʻl xaritasi" tasdiqlandi.