Тадбиркорлик лойиҳаларини молиявий қўллаб-қувватлаш кенгайтирилади

2026-2027 йилларда Тадбиркорликни ривожлантириш компанияси томонидан 5 минг тадбиркорлик лойиҳасига 4 трлн сўм миқдорида молиявий қўллаб-қувватлаш тақдим этилади.

2025 йил 1 ноябрдан бошлаб қуйидагиларни назарда тутувчи қўшимча инструментлар жорий этилади:

тадбиркорлик субъектларини "чемпион" тадбиркор тоифасига олиб чиқишга кўмаклашиш учун ишлаб чиқариш ва хизмат кўрсатиш соҳасидаги лойиҳаларга миллий ва хорижий валютада 10 млрд сўмгача кредитлар ажратиш учун банклар орқали ресурслар жойлаштириш;

банклар томонидан кичик тадбиркорлик субъектларининг ишлаб чиқариш, хизмат кўрсатиш ва "яшил" иқтисодиёт йўналишидаги микролойиҳаларига ажратилган 500 млн сўмгача кредитларни қуйидаги шартларда қайта молиялаштириш:

– ажратилган кредитнинг фоиз ставкасини 6 фоизгача, лекин Марказий банк асосий ставкасидан 4 фоизлик пункт юқори ставкагача пасайтириш;

– камида 1 йил фаолият юритган ва 2 нафар ходими бўлган, 5 ва ундан ортиқ янги иш ўринларини яратишни назарда тутган тадбиркорлик субъектларининг лойиҳаларига тақдим этиш.

Тадбиркорликни ривожлантириш компаниясининг кафолат ва кафиллик тақдим этиш тизимини халқаро стандартларга мослаштириш учун унинг муассислигида акциядорлик жамияти шаклида кафолатлар бериш ташкилоти ташкил этилади.

2026 йил 1 январдан бошлаб Компания узоқ ва бориш қийин ҳудудларда рўйхатдан ўтган кичик ва ўрта тадбиркорлик субъектларига ажратилган кредитларни мос равишда 1,5 ва 5 млрд сўмгача Марказий банк асосий ставкасидан тўрт фоизлик пункт юқори ставкасигача қайта молиялаштириш йўли билан компенсациялар тақдим этади. Бунда:

қайта молиялаштириш тадбиркорлик субъектларида банд бўлган ходимлардан Камбағал оилалар реестрига киритилган оилалар аъзолари камида:

- 5 нафарни ташкил қилганда – 2 фоизгача;

- 10 нафарни ташкил қилганда – 4 фоизгача;

- 20 нафарни ташкил қилганда – 6 фоизгача амалга оширилади.

Бундан ташқари, бизнес-режа ва лойиҳаларнинг самарадорлик кўрсаткичлари паст бўлганда тўхтатилган молиявий ёрдамни Иқтисодиёт ва молия вазирлиги ҳамда тармоқ уюшмалари томонидан белгиланган йўналишлар бўйича тиклаш ҳуқуқи берилади.

Компания 2026-2028 йилларда 500 млрд сўм миқдорида корпоратив облигациялар чиқаради.

Иқтисодиёт ва молия вазирлиги 2026 йилдан бошлаб ҳар йили Компанияга унинг буюртмасига кўра "қайта молиялаштириш" ва "ресурс жойлаштириш" инструментлари учун 7 йил муддатга, 3 йиллик имтиёзли даврни ўз ичига олган ҳолда, Марказий банк асосий ставкасидан 2 фоиз пунктга паст ставкада 300 млрд сўмгача бюджет ссудасини ажратади.

2026 йил 1 январга қадар Компаниянинг "Тадбиркор" ахборот тизими ташкилотларнинг (рўйхат бўйича) ахборот тизимлари билан интеграция қилинади.

Тадбиркорлик фаолиятини молиявий қўллаб-қувватлашни кенгайтириш бўйича "Йўл харитаси" тасдиқланди.