Termizga 35 dona zamonaviy Zhongtong avtobuslari olib kelinadi

Ayni damda Surxondaryo viloyati Transport boshqarmasi boshligʻi hamda “Termiztransportxizmat” MChJ rahbari Xitoy Xalq Respublikasida xizmat safarida boʻlib turibdi.

Mutasaddilar xizmat safari doirasida “Zhongtong Bus” zavodiga tashrif buyurib, Termiz shahri uchun moʻljallangan avtobuslarni ishlab chiqarish jarayonlarining yakuniy bosqichi bilan yaqindan tanishdi. Tez kunlarda ushbu zamonaviy avtobuslar Termiz shahriga yetkaziladi.

Dastlabki bosqichda 35 dona zamonaviy Zhongtong avtobuslari olib kelinishi rejalashtirilgan boʻlsa, yil yakuniga qadar yana 65 dona shu turdagi harakat tarkiblari olib kelinadi.     

Mazkur avtobuslar aholiga qulay, xavfsiz va sifatli jamoat transporti xizmatlarini taqdim etishda, shahar transport tizimini yanada rivojlantirishda muhim qadam boʻlib xizmat qiladi.

Shu orqali Termiz shahrida yoʻlovchilar harakati ancha yengillashib, transport xizmatlari sifati yangi bosqichga koʻtarilishi kutilmoqda.