Toshkent metropolitening 13 ta bekatida bittadan vestibyullaridagi kassalar yopildi

Toshkent metropoliteni yoʻlovchilariga qulaylik yaratish hamda kassa oldidagi tirbandliklarni kamaytirish maqsadida metrodan foydalanishda yoʻl haqini toʻlashning 10 dan ortiq turi mavjud. 

Jumladan, QR-kodli bir martalik chiptalar 3000 soʻmni tashkil qilsa, boshqa toʻlov usullari 1700 soʻm va undan ham arzon. Shuni inobatga olib, hozirgi vaqtga kelib yoʻlovchilarning kam sonli qismigina naqd pul koʻrishida, yaʼni kassadan QR-kodli chipta harid qilib yoʻl haqini toʻlashmoqda.

Raqamlarga qaraydigan boʻlsak, ilgari  bir martalik QR-kodli chiptalardan metro yoʻlovchilarining 45-50 foizi foydalangan boʻlsa, hozirgi vaqtga kelib qariyb 6-7 foizni tashkil qilmoqda.

Uzoq vaqt davom etgan kuzatuv va oʻrganishlar natijalariga koʻra, bir qancha metro bekatlaridagi vestibyullarda joylashgan kassalarda chiptalar harid qilinish koʻrsatgichi keskin kamaygani aniqlandi. 

Shu boisdan, naqd pul koʻrinishida toʻlovni amalga oshiruvchi yoʻlovchilar soni kam boʻlgan 13 ta metro bekatlarining (Mirzo Ulugʻbek, Xalqlar doʻstligi, Paxtakor, Hamid Olimjon, Pushkin, Doʻstlik, Toshkent, Oybek, Tinchlik, Shahriston, Bodomzor, Minor hamda Abdulla Qodiriy ) bittadan vestibyullaridagi kassalar yopildi va ushbu vestibyullarga chipta sotib olish uchun avtomatlashtirilgan bankomatlar sinov tariqasida oʻrnatilmoqda.

Shuningdek, metro yoʻlovchilari kassa yopilgan vestibyullarda ham avtomatlashtirilgan toʻlov turlarining boshqa usullari orqali toʻlov qilish imkoniyatiga ega (ATTO kartalari, bank kartalari, turli mobil ilovalar, kaft orqali va boshqa toʻlov usullari). 

Yuqoridagi toʻlov usullarining afzalliklari shundaki, yoʻlovchilar oʻz vaqtlarini tejashi, yaʼni kassa oldida navbat kutmasdan, qolaversa, metroda yoʻl haqini arzon tarifda toʻlashlari mumkin.