Toshkent viloyatida noqonuniy mayning qurilmalardan foydalanish holatlari fosh etildi

Unga koʻra, mayning firmalar tomonidan elektr energiyasidan noqonuniy foydalanilgani natijasida davlat manfaatlariga jami 16 milliard 553 million soʻm zarar yetkazilgan.  

“Oʻzenergoinspeksiya” axborot xizmatining maʼlum qilishicha, Parkent tumanida istiqomat qiluvchi fuqaro P.O. ga qarashli dala hovlida mayning qurilmalarning oʻzboshimchalik bilan elektr tarmogʻiga ulanishi natijasida davlat manfaatlariga 3 milliard 476 million soʻm miqdorida zarar yetkazilgan.  

Yangiyoʻl shahrida istiqomat qiluvchi fuqaro I. N ga qarashli xonadonda ham hech qanday ruxsatnomasiz mayning faoliyati bilan shugʻullanib, 1 milliard 19 million soʻmlik elektr energiyasi talon-toroj qilingani aniqlandi.  

Ayni paytda “Oʻzenergoinspeksiya” va qator tegishli tashkilotlar hamkorligida aniqlangan mazkur holatlar yuzasidan Jinoyat kodeksining tegishli moddalariga asosan tergov harakatlari oʻtkazilmoqda.  

Shuningdek, inspeksiya nafaqat elektr va tabiiy gazdan noqonuniy foydalanish, balki AGTKShlar faoliyatida meʼyor va qoidalarga amal qilmaslik holatlarini aniqlamoqda.  

Masalan, yaqinda inspeksiyaning Andijon viloyati hududiy boshqarmasi tomonidan Andijon tumanida joylashgan «O. T. G.» MChJga qarashli avtomobillarga gaz toʻldirish kompressor shoxobchasi faoliyati oʻrganildi. Unda shoxobchada oʻrnatilgan texnologiya jarayonlarining amaldagi meʼyor va qoidalarga muvofiqligi, tabiiy gazni qabul qilib olish, saqlash, tarqatilish holatlariga ahamiyat qaratildi.  

Aniqlanishicha, ushbu AGTKSh faoliyatida aholi hayoti va sogʻligʻiga xavf tugʻilishi bilan bogʻliq boʻlgan qoʻpol qoidabuzarliklarga yoʻl qoʻyilgan. Hozirda ushbu kamchiliklar bartaraf etilgunga qadar mazkur AGTKSh tabiiy gaz taʼminotidan ajratilgan.  

Xulosa oʻrnida aytish mumkinki, bu kabi nazorat tadbirlarini oʻtkazishdan maqsad isteʼmolchilarni tabiiy boyligimiz boʻlgan energiya resurslaridan oqilona va samarali foydalanishga undashdir. Ular bu boradagi har qanday noqonuniy holatga tegishli organlar tomonidan huquqiy baho berilishi va qonunda belgilab qoʻyilgan meʼyorlar asosida javobgarlikka tortilishi muqarrar ekanligini zinhor unutmasligi  kerak.