Toshkentda “apk” viruslari orqali fuqarolarning pullarini oʻgʻirlagan jinoiy guruh qoʻlga olindi

Ichki ishlar vazirligi Kiberxavfsizlik markazi xabariga koʻra, poytaxtda fuqarolarning shaxsiy maʼlumotlari va moliyaviy mablagʻlarini noqonuniy yoʻl bilan qoʻlga kiritib kelgan jinoiy guruh faoliyati fosh etildi.

“Xavfsiz kiber makon” tezkor-profilaktik tadbirlari doirasida oʻtkazilgan maxsus reyd chogʻida aniqlanishicha, guruh aʼzolari Android qurilmalari uchun “apk” virusli dasturlar ishlab chiqib, ularni fuqarolarga yuborgan. Ushbu zararli dasturlar orqali ular SMS xabarlari, qoʻngʻiroqlar va kontakt maʼlumotlarini qoʻlga kiritib, noqonuniy daromad orttirib kelishgan.

Tergov-surishtiruv davomida virusli dasturlar Telegram guruhlariga ulangan boʻlib, unda 11 nafar turli davlat fuqarolari ishtirok etgani maʼlum boʻldi. Ular fuqarolarning shaxsiy maʼlumotlarini oʻgʻirlash bilan shugʻullanib kelgan. Oʻtkazilgan tezkor tadbirlar natijasida guruhning 5 nafar aʼzosi qoʻlga olindi.

Shuningdek, ular yashash manzillari va telefon qurilmalari koʻzdan kechirilganda, 133 nafar fuqarodan qariyb 3 milliard soʻm mablagʻ oʻgʻirlangani aniqlangan. Oʻgʻirlangan pul mablagʻlari guruh aʼzolari oʻrtasida taqsimlanib kelgan.

Hozirda gumonlanuvchilarga nisbatan Jinoyat kodeksining tegishli moddalariga asosan jinoyat ishi qoʻzgʻatilib, ular protsessual tartibda ushlangan.

Tergov organlari jinoiy guruhga aloqador boshqa shaxslarni aniqlash maqsadida respublika boʻylab tezkor-qidiruv tadbirlarini davom ettirmoqda.