Oʻzbekistonda onlayn ish niqobi ostidagi moliyaviy piramida aniqlandi

Oʻzbekistonda minglab fuqarolar navbatdagi moliyaviy piramidaning qurboniga aylandi. 

Kiberxavfsizlik markazi maʼlumotiga koʻra, ushbu shaxslar onlayn ishga taklif qilish bahonasida goʻyoki muntazam daromad topish mumkinligini vaʼda qilib, har bir fuqarodan kamida 3 million 500 ming soʻm miqdorida toʻlovni aldov yoʻli bilan undirib olgan.

Maxfiy guruhlarga qoʻshilgan fuqarolarga 3 million 500 ming soʻm toʻlov evaziga onlayn ishga qabul qilinishi, shuningdek, maʼlum topshiriqlarni bajargandan soʻng har hafta xizmat haqi toʻlab berilishi aytilgan. Shu yoʻl bilan fuqarolar firibgarlik sxemasiga jalb etilgan.

Toʻlov qilib, soxta ishga qabul qilinganlarga tanishlariga maxsus taklif havolasini yuborish imkoniyati berilgan. Agar ushbu havola orqali boshqa fuqarolar ham toʻlovni amalga oshirsa, mablagʻning 10 foizi havolani yuborgan shaxsga mukofot sifatida berilishi vaʼda qilingan.

«Ushbu holatlar moliyaviy piramida va firibgarlik alomatlariga ega. Fuqarolarga bunday takliflarga ishonmaslik, shubhali guruhlar va shaxslarga pul oʻtkazmaslik qatʼiy tavsiya etiladi», — deyiladi rasmiy xabarda.