Onlayn kredit firibgarligiga uchragan fuqarolardan qarz undirish toʻxtatiladi

Onlayn kredit olish jarayonida firibgarlik qurboniga aylangan fuqarolardan kredit qarzini undirish vaqtincha toʻxtatiladi.

Adliya vazirligi Markaziy bank bilan hamkorlikda kredit va toʻlov tashkilotlari, shuningdek, toʻlov tizimi operatorlari tomonidan jismoniy shaxslarga masofadan moliyaviy xizmatlar koʻrsatishda axborot xavfsizligi va kiberxavfsizlikni taʼminlash hamda firibgarlik (frod) holatlarining oldini olish boʻyicha minimal talablar toʻgʻrisidagi nizomni davlat roʻyxatidan oʻtkazdi.

Nizomga koʻra, agar fuqaro nomiga firibgarlik yoʻli bilan onlayn kredit rasmiylashtirilgan boʻlsa va u surishtiruvchi, tergovchi, prokuror qarori yoki sud ajrimi asosida jabrlanuvchi deb eʼtirof etilsa, kredit tashkiloti mazkur kredit hamda u bilan bogʻliq foizlarni hisoblash va undirishni toʻxtatadi.

Shu bilan birga, kredit tashkiloti yetkazilgan moddiy zararni firibgarlikni sodir etgan shaxsdan regress tartibida undirish huquqiga ega.

Agar kredit tashkiloti firibgarlik holatidan shubhalansa, qonunchilikda belgilangan tartibda tegishli organlarga murojaat qilishi mumkin.

Biroq surishtiruv, dastlabki tergov natijalari yoki sud qaroriga asosan firibgarlik holati aniqlanmasa, kredit tashkiloti onlayn kredit va unga bogʻliq foizlarni hisoblash hamda undirishni davom ettiradi.