Ukraina 1992 yilgi MDH chegaralarini himoya qilish toʻgʻrisidagi bitimdan chiqdi

Prezidentning 2026 yil 26 yanvardagi 82/2026-sonli farmoniga muvofiq, Ukraina 1992 yil 20 mart kuni Kiyev shahrida imzolangan MDHga aʼzo davlatlarning davlat chegaralari va dengiz iqtisodiy zonalarini muhofaza qilish toʻgʻrisidagi bitimdagi ishtirokini toʻxtatdi.

Qaror Ukraina Konstitutsiyasi, «Xalqaro shartnomalar toʻgʻrisida»gi qonunchilik hamda Vena konvensiyasi normalariga asoslangan holda qabul qilingan.

Farmonga koʻra, Ukraina Tashqi ishlar vazirligiga mazkur qaror haqida bitim depozitariysini rasman xabardor qilish vazifasi yuklatilgan. Bu esa Ukrainaning MDH mamlakatlari bilan chegara xavfsizligi va dengiz hududlarini boshqarish sohasidagi koʻp tomonlama hamkorligi toʻliq toʻxtatilganini anglatadi.

Maʼlumot uchun, ushbu bitim 1992 yilda sobiq Ittifoq parchalanganidan soʻng yangi mustaqil davlatlar oʻrtasida chegara xavfsizligini taʼminlash maqsadida tuzilgan edi.

Mutaxassislar fikricha, mazkur qaror Ukrainaning MDH doirasida qolgan formal majburiyatlaridan bosqichma-bosqich voz kechish jarayonining mantiqiy davomi boʻlib, mamlakatning milliy xavfsizlik masalalarida Yevropa Ittifoqi va NATO kabi xalqaro tuzilmalar bilan hamkorlikka ustuvor ahamiyat qaratayotganini koʻrsatadi.