Moldova MDH aʼzoligini tugatish sari qadam qoʻydi

Bu haqda tashqi ishlar vaziri Mixay Popshoy maʼlum qildi.

Vazirning taʼkidlashicha, ayni paytda MDHni tashkil etuvchi asosiy hujjatlarni bekor qilish (denonsatsiya qilish) ustida ishlar olib borilmoqda. Xususan, 1993 yil 22 yanvarda Minsk shahrida imzolangan MDH Nizomi, 1991 yil 8 dekabrdagi MDHni tashkil etish toʻgʻrisidagi bitim hamda 1991 yil 22 dekabrda qabul qilingan unga ilova haqida soʻz bormoqda.

«Ushbu uchta asosiy shartnoma bekor qilingach, Moldova Respublikasi rasman MDH tarkibidan chiqadi. Bu jarayon allaqachon boshlangan. Qaror yaqinda qabul qilindi, hozir esa tasdiqlash bosqichi davom etmoqda», — dedi Popshoy.

Uning soʻzlariga koʻra, parlamentning yangi sessiyasi boshlanganidan soʻng denonsatsiyaga oid hujjatlar qonun chiqaruvchilar tomonidan koʻrib chiqiladi.

«Fevral oyining oʻrtalariga qadar, ehtimol, hukumat darajasidagi barcha jarayonlar yakunlanadi. Shundan soʻng parlament ushbu qarorni qabul qiladi», — dedi vazir.

Popshoy taʼkidlaganidek, agar qonun chiqaruvchi organ uchta taʼsis shartnomasini bekor qilishni maʼqullasa va prezident barcha texnik bosqichlar yakunlanganidan soʻng ularni tasdiqlasa, Moldova MDH aʼzoligini toʻliq tugatadi.

Maʼlumot uchun, Moldova hozirgacha MDH doirasida jami 283 ta kelishuv imzolagan. Ularning 71 tasi allaqachon bekor qilingan, taxminan 60 tasi esa bekor qilish jarayonida. Kishinyov rasmiylari Rossiyaning Ukrainaga bostirib kirishidan soʻng, 2022 yil fevral oyida MDH bilan tuzilgan kelishuvlarni bekor qilish jarayonini boshlagan edi.