Tajovuzkor ritorika davom etmoqda: navbat Valuyevga

Endi esa ular ortidan sobiq sportchi, hozirda Rossiya Federatsiyasi Davlat Dumasi deputati hamda Turizm qoʻmitasi raisi birinchi oʻrinbosari Nikolay Valuyev chiqdi. U boshqa davlatlarda, jumladan sobiq Ittifoq mamlakatlarida ham “maxsus harbiy amaliyotlar” oʻtkazilishi mumkinligi haqida dagʻdagʻali bayonot berdi.

Valuyevning aytishicha, Rossiyani hali koʻplab “maxsus operatsiyalar” kutmoqda. U Aleksandr Dugin fikrlarini qoʻllab-quvvatlab, Rossiya 30 yil davomida postsovet respublikalariga nisbatan “pryanik” siyosati yuritgani, ammo bu samara bermaganini taʼkidlagan. Uning fikricha, endi “qamchi” kerak.

Shuningdek, Valuyev yoshlarni harbiy harakatlarga tayyorlash zarurligini bildirib, “zumerlar”ni sport zallariga borib, jismoniy tayyorgarlik koʻrishga chaqirdi. Uning aytishicha, yaqin kelajakda ular uchun “qahramonlik koʻrsatish davri” boshlanadi. Valuyev jamiyatda faqat “gʻalabaga hissa qoʻshgan yoki bunga tayyor boʻlgan” shaxslargina toʻliq huquqlarga ega boʻlishi kerak, degan keskin fikrni ham ilgari surdi.

Avvalroq Rossiya Tashqi ishlar vazirligi rasmiy vakili Mariya Zaxarova teleboshlovchi Vladimir Solovyovning Rossiya tashqi siyosatiga oid bayonotlariga izoh berib:

“Bu jurnalistning shaxsiy fikri. U xususiy ‘Solovyov LIVE’ kanalida bildirilgan. Men iqtiboslarni oʻqidim va ular kontekstdan yulib olinmagan. Bunga javob berish mening vakolatimga kirmaydi”, degan edi.

Biroq endilikda bu tajovuzkor fikrlar jurnalist emas, balki Rossiya hukumatda amalda faoliyat olib borayotgan siyosatchi tilidan yangramoqda. Rossiya Tashqi ishlar vazirligi bu holatga qanday munosabat bildirishi hali nomaʼlum.