O‘zbekistonda erta nikoh va diniy nikoh marosimi uchun jarimalar oshirildi

O‘zbekistonda nikoh yoshiga oid qonunchilikni va nikoh tuzish tartibini buzganlik uchun ma’muriy jarimalar oshirildi. Tegishli o‘zgartirishlar Prezident Shavkat Mirziyoyev 2026-yil 14-oktabrda imzolagan qonunda nazarda tutilgan.

Voyaga yetmagan bilan nikoh munosabatlariga kirishish

Nikoh yoshiga yetmagan shaxs bilan amalda nikoh munosabatlariga kirishganlik uchun jarima BHMning 10 baravaridan 15 baravarigacha etib belgilandi. Avval bu miqdor 5–10 baravar edi.

Voyaga yetmaganni turmushga berish yoki uylantirish

Ota-onalar yoki ularning o‘rnini bosuvchi shaxslar tomonidan nikoh yoshiga yetmagan shaxsni turmushga berish yoki uylantirish uchun BHMning 20 baravaridan 25 baravarigacha jarima solinadi. Ilgari jarima 7–15 baravarni tashkil etgan.

Davlat ro‘yxatidan o‘tmagan nikoh uchun diniy marosim

Qonunda belgilangan tartibda davlat ro‘yxatidan o‘tkazilmagan nikoh bo‘yicha, jumladan, nikoh yoshiga yetmagan shaxs ishtirokida diniy marosim o‘tkazganlik uchun jarima BHMning 30 baravaridan 50 baravarigacha oshirildi. Avval bu miqdor 15–30 baravar edi.

O‘zgarishlar Ma’muriy javobgarlik to‘g‘risidagi kodeksning 47³-moddasiga kiritildi. Qonunning asosiy maqsadlaridan biri bolalarning huquq va qonuniy manfaatlarini himoya qilishni kuchaytirishdir.