Topishmoqning javobi topilmadi: BAA oʻzbekistonliklarni nega qabul qilmadi?

Shu yilning 30 noyabr kuni BAAning Abu-Dabi shahriga Toshkent – Abu-Adabi yoʻnalishi boʻyicha Wizz Air aviaqatnovi orqali uchib kelgan 31 nafar Oʻzbekiston fuqarosi amirlikka kiritilmadi. Bundan xabar topgan Oʻzbekistonning Abu–Dabidagi elchixonasi va Dubaydagi Bosh konsulxonasi mazkur aeroport maʼmuriyati hamda amirliklarning mutasaddi idoralari vakillari bilan muloqotda boʻlib, vaziyatni nazoratga olganini bildirdi.

"Aeroport maʼmuriyati bilan hamkorlikda hamyurtlarimizni uch mahal ovqat bilan taʼminlash hamda ularga zarur hollarda tibbiy yordam koʻrsatish choralari tashkil etildi. Yuzaga kelgan vaziyatni hal etish boʻyicha barcha chora-tadbirlar koʻrilmoqda",  deyiladi elchixona izohida.

"Gazeta.uz" nashri bilan bogʻlangan Shayx Zoid aeroportidagi fuqarolardan birining aytishicha, ayollar, bolalar va keksalar qoʻyib yuborilgan, 20 dan 40 yoshgacha boʻlgan erkaklar mamlakatdan chiqarib yuborilishi mumkinligi bildirilgan. 

Ammo ularning hech biriga bu kabi harakatlar nima sababdan amalga oshirilayotgani yuzasidan izoh berilmagan. 

"Uchib kelishimiz bilan pasport nazoratida bizni shunchaki chetga tortib, hech qanday tushuntirishlarsiz pasportlarimizni olib qoʻyishni boshlashdi. Biz qandaydir maʼlumot berishlarini kutib oʻtirdik. Keyin birma-bir chaqirib, nima maqsadda, qancha kunga kelganimizni soʻray boshlashdi, telefon raqamlarimizni olishdi va savollarimizga javob bermagan holda yana ortga chiqarib yuborishdi. Shunday qilib, 15 soat oʻtirdik", degan Shayx Zoid aeroportidagi Oʻzbekiston fuqarolaridan biri.

Yuqoridagi holat ommaviy axborot vositalari orqali keng yoritilishni boshlaganidan soʻng, Abu-Dabiga kiritilmagan oʻzbekistonliklar masalasi hukumat tomonidan muhokama qilindi. 

Kecha, 2 dekabr kuni Oʻzbekiston Tashqi ishlar vazirining birinchi oʻrinbosari Bahromjon Aʼloyev Birlashgan Arab Amirliklarining Oʻzbekiston Respublikasidagi elchisi Said Matar al-Qamziyni qabul qilib, oʻzbekistonliklarning BAAga kirishi bilan bogʻliq muammoni gaplashdi. Ushbu holatni esa imkon qadar qisqa muddatlarda hal qilish boʻyicha tegishli chora-tadbirlar koʻrishga kelishib oldi.  

Ammo 31 nafar oʻzbekistonlikning Abu–Dabi aeroportidan amirlikka nega qoʻyilmaganligi hanuzgacha ochiqlanmasdan sirligicha qolmoqda.