Топишмоқнинг жавоби топилмади: БАА ўзбекистонликларни нега қабул қилмади?

Шу йилнинг 30 ноябрь куни БААнинг Абу-Даби шаҳрига Тошкент – Абу-Адаби йўналиши бўйича Wizz Air авиақатнови орқали учиб келган 31 нафар Ўзбекистон фуқароси амирликка киритилмади. Бундан хабар топган Ўзбекистоннинг Абу–Дабидаги элчихонаси ва Дубайдаги Бош консулхонаси мазкур аэропорт маъмурияти ҳамда амирликларнинг мутасадди идоралари вакиллари билан мулоқотда бўлиб, вазиятни назоратга олганини билдирди.

"Аэропорт маъмурияти билан ҳамкорликда ҳамюртларимизни уч маҳал овқат билан таъминлаш ҳамда уларга зарур ҳолларда тиббий ёрдам кўрсатиш чоралари ташкил этилди. Юзага келган вазиятни ҳал этиш бўйича барча чора-тадбирлар кўрилмоқда",  дейилади элчихона изоҳида.

"Газета.uz" нашри билан боғланган Шайх Зоид аэропортидаги фуқаролардан бирининг айтишича, аёллар, болалар ва кексалар қўйиб юборилган, 20 дан 40 ёшгача бўлган эркаклар мамлакатдан чиқариб юборилиши мумкинлиги билдирилган. 

Аммо уларнинг ҳеч бирига бу каби ҳаракатлар нима сабабдан амалга оширилаётгани юзасидан изоҳ берилмаган. 

"Учиб келишимиз билан паспорт назоратида бизни шунчаки четга тортиб, ҳеч қандай тушунтиришларсиз паспортларимизни олиб қўйишни бошлашди. Биз қандайдир маълумот беришларини кутиб ўтирдик. Кейин бирма-бир чақириб, нима мақсадда, қанча кунга келганимизни сўрай бошлашди, телефон рақамларимизни олишди ва саволларимизга жавоб бермаган ҳолда яна ортга чиқариб юборишди. Шундай қилиб, 15 соат ўтирдик", деган Шайх Зоид аэропортидаги Ўзбекистон фуқароларидан бири.

Юқоридаги ҳолат оммавий ахборот воситалари орқали кенг ёритилишни бошлаганидан сўнг, Абу-Дабига киритилмаган ўзбекистонликлар масаласи ҳукумат томонидан муҳокама қилинди. 

Кеча, 2 декабрь куни Ўзбекистон Ташқи ишлар вазирининг биринчи ўринбосари Баҳромжон Аълоев Бирлашган Араб Амирликларининг Ўзбекистон Республикасидаги элчиси Саид Матар ал-Қамзийни қабул қилиб, ўзбекистонликларнинг БААга кириши билан боғлиқ муаммони гаплашди. Ушбу ҳолатни эса имкон қадар қисқа муддатларда ҳал қилиш бўйича тегишли чора-тадбирлар кўришга келишиб олди.  

Аммо 31 нафар ўзбекистонликнинг Абу–Даби аэропортидан амирликка нега қўйилмаганлиги ҳанузгача очиқланмасдан сирлигича қолмоқда.