Xiaomi elektromobil yetkazib berishni mart oyi oxirida boshlashni rejalashtirmoqda

Xiaomi kompaniyasining birinchi elektr avtomobili SU7 2023-yil 28-dekabr Pekindagi tadbirda namoyish etilgan edi.

Kompaniya seshanba kuni kuchli raqobat sharoitida dunyodagi eng yirik avtomobil bozoriga kirib, oʻzining birinchi elektr avtomobili modeli SU7 ni yetkazib berishni boshlashini eʼlon qildi.

Xitoyning beshinchi yirik smartfon ishlab chiqaruvchisi Weibo'dagi postida mamlakat boʻylab 29 ta shaharda buyurtmalarni qabul qiladigan 59 ta doʻkoni borligini aytdi.

Yangi model savdolarini boshlanishi 28-martga rejalashtirilgan.

Bu eʼlon qilinganidan koʻp oʻtmay Xiaomi aksiyalari 7 foizga qimmatlashdi.

Xitoyning elektromobil sanoati yanvar-fevral oylarida 18 foizga oʻsdi, bu 2023-yil davomida kuzatilgan 21 foizlik oʻsishdan unchalik uzoq emas.

Bu yil bozorda yetakchi sanalgan BYD boshchiligida bir qator kompaniyalar ichki talabning pasayishi natijasida isteʼmolchilarni oʻziga jalb qilish uchun narxlarni maksimal darajada tushira boshladi.

Dekabr oyida Speed   Ultra 7 (SU7) sedani taqdimotida bosh ijrochi Ley Jun Xiaomi dunyoning eng yaxshi beshta avtomobil ishlab chiqaruvchilardan biriga aylanishni rejalashtirayotganini aytdi.

Leyning taʼkidlashicha, SU7 "super elektr motor" texnologiyasiga ega, bu Tesla va Porsche elektromobillariga qaraganda tezroq tezlashishga qodir.

Tahlilchilarning fikricha, avtomobilning Xiaomi telefonlari va boshqa elektron qurilmalari bilan birgalikda boshqarilishi kompaniyaning mavjud mijozlariga yoqadi.

Uning avtomobillari Pekindagi zavodda yiliga 200 ming avtomobil ishlab chiqarish quvvatiga ega BAIC Group davlat avtomobil ishlab chiqaruvchisi tomonidan ishlab chiqariladi.

Smartfon giganti oʻn yil ichida avtomobillarga 10 milliard dollar sarmoya kiritishga vaʼda bergan.