Sentabr oyida Oʻzbekistonda elektromobillar savdosi rekord darajaga yetdi

Maʼlumotlarga koʻra, sentabr oyida umumiy yengil avtomobil savdosi 84,6 ming donani tashkil etdi — bu avgust oyiga nisbatan 6,4 foizga kam. Eng katta pasayish Surxondaryo, Navoiy viloyatlari va Toshkent shahrida, eng yuqori oʻsish esa Sirdaryo va Toshkent viloyatlarida kuzatilgan.

Birlamchi bozor

Yangi yengil avtomobillar segmentida faollik mavsumiy ravishda pasaygan. Savdo hajmi 15,2 foizga kamayib, 31,9 ming dona avtomobil sotilgan.

Mahalliy ishlab chiqarilgan avtomobillar — 27,4 ming dona (−16,1%).

Import avtomobillar — 4,5 ming dona (−8,9%).

Ikkillamchi bozor

Ikkillamchi yengil avtomobil bozori barqarorligini saqlab qoldi — 52,6 ming dona mashina sotilgan, bu oʻtgan oyga nisbatan atigi 0,1 foizga kam.

Elektromobillar segmenti

Sentabr oyida 7,8 ming dona elektromobil sotilib, bu avgust oyiga nisbatan 21,6 foizga koʻp. Bu hozirgacha kuzatilgan eng yuqori koʻrsatkich sifatida qayd etildi.

Joriy yilning uchinchi choragida sotilgan yengil elektromobillar soni 20,7 ming donani tashkil etdi — bu oʻtgan yilning shu davriga nisbatan 2,2 barobar koʻp. Eng katta oʻsish Toshkent shahri, Toshkent va Samarqand viloyatlarida qayd etilgan.