Xorvatiyaga ishga yuborishni vaʼda qilgan firibgarlar ushlandi

Buxoro shahrida yashovchi, 1997 y.t., muqaddam firibgarlik jinoyatini sodir qilgan shaxs Toshkent shahri, Toshkent va Qashqadaryo viloyatlarida istiqomat qiluvchi 3 nafar fuqaroga oʻzini goʻyoki sayyohlik firma vakili sifatida tanishtirib, ularning ishonchiga kiradi.

Soʻngra Xorvatiya davlatida tanishlari borligini aytib, ularni ishchi viza asosida ushbu mamlakatga ishga yuborish evaziga 6000 AQSh dollari talab qiladi.

DXX Toshkent shahar boʻyicha boshqarmasi hamda IJQKD xodimlari hamkorligida Yakkasaroy tumanida oʻtkazilgan tezkor tadbirda, u soʻralgan pul mablagʻidan 3000 AQSh dollarini oldindan olgan vaqtida ashyoviy dalillar bilan ushlandi.

Bu kabi firibgarlik holati Namangan viloyatida ham qayd etilib, xususan, Namangan shahrida yashovchi, 1999 y.t. shaxs aldov yoʻli bilan 3 nafar hamshaharining ishonchiga kiradi.

Mazkur shaxs hozirda Xorvatiya davlatida ishlovchi akasining koʻmagida ularni ushbu mamlakatga ishlash uchun yuborish evaziga har biridan 2600 AQSh dollari, jami 7800 AQSh dollari talab qiladi.

Ammo, u Yangi Namangan tumanida ushbu pul mablagʻidan 3900 AQSh dollarini olgan vaqtida DXX va Bosh prokuratura huzuridagi Departament xodimlari tomonidan qoʻlga olindi.

Hozirda ikkala qonunbuzarga nisbatan Jinoyat kodeksining 168-moddasi (firibgarlik) 2-qismi “a” bandi bilan jinoyat ishlari qoʻzgʻatilib, tergov harakatlari olib borilmoqda.