Yangi yil bayramini nishonlash uchun byudjet puli ishlatilmaydi

Qarorga koʻra, vazirliklar, idoralar, viloyatlar va Toshkent shahar hokimliklari, shuningdek davlat ulushi 50 foizdan kam boʻlmagan xoʻjalik birlashmalariga byudjet hamda byudjetdan tashqari mablagʻlar hisobidan Yangi yil munosabati bilan korporativ tadbirlar oʻtkazish va bayram dasturxoni yozish man etiladi.

Maʼlum qilinishicha, mazkur cheklov davlat mablagʻlarini maqsadsiz sarflashning oldini olishga qaratilgan. Shu bilan birga, davlat organlari va tashkilotlari xodimlari oʻz shaxsiy mablagʻlari — oylik maoshi yoki ragʻbat pullari hisobidan, ishdan tashqari vaqtda Yangi yil tadbirlarini tashkil etishlari mumkin.

Ushbu talab davlatga qarashli boʻlmagan tijorat tashkilotlari, xususiy firmalar va kompaniyalarga taalluqli emas.

Qayd etish joizki, Oʻzbekistonda avvalgi yillarda ham byudjet mablagʻlari hisobidan Yangi yil korporativ bayramlarini oʻtkazish taqiqlangan edi. 

“Byudjet puli — xalqning puli. Uning har bir tiyini hisobli. Xalqimiz bu mablagʻlarni bizning oʻyin-kulgi qilishimiz uchun bermagan”, — deya taʼkidlagan Bosh vazir Abdulla Aripov.