Rossiya “Telegram”ni ham bloklashi mumkin

Rossiya hukumati “Telegram” messenjeriga nisbatan bosimni yanada kuchaytirmoqda. Soʻnggi maʼlumotlarga koʻra, platforma nafaqat sekinlashtirilishi, balki mamlakat hududida toʻliq toʻxtatilishi ham mumkin.

9 fevraldan boshlab Rossiyada foydalanuvchilar “Telegram”dagi texnik uzilishlardan shikoyat qila boshlagan. “RBK” nashri manbalariga koʻra, “Roskomnadzor” messenjer faoliyatini cheklash boʻyicha yangi choralar koʻrilmoqda.

Sekinlashtirishmi yoki toʻliq blokirovka?

Mutaxassislar fikricha, 10 fevraldan boshlab messenjer ishini “qisman cheklash”ning texnik bosqichi boshlangan. Ayrim manbalarga koʻra, sekinlashtirish jarayoni amalda allaqachon ishga tushgan.

Hozirda foydalanuvchilar quyidagi muammolarga duch kelmoqda:

• foto va videolar yuklanmasligi;
• xabarlarning kechikib yetib borishi;
• matnli xabarlarda ham uzilishlar yuzaga kelishi.

Jurnalist va “Kripta” kitobi muallifi Andrey Zaxarovning taʼkidlashicha, yaqin kunlarda cheklovlar yanada kuchayishi va hatto oddiy matnli xabar yuborish ham qiyinlashishi mumkin.

Rasmiy munosabat

Hozircha rasmiy doiralar tomonidan aniq va yakdil bayonot berilgani yoʻq. Davlat Dumasining axborot siyosati qoʻmitasi raisi oʻrinbosari Aleksandr Yushchenko qoʻmita darajasida messenjerni sekinlashtirish masalasi muhokama qilinmaganini bildirdi. Shu bilan birga, u “Roskomnadzor” qonun talablari buzilgan taqdirda mustaqil ravishda cheklov qoʻllashi mumkinligini inkor etmadi.

Eslatib oʻtamiz, 2025 yil avgust oyida “Telegram”ning ovozli qoʻngʻiroqlar xizmati “firibgarlik va terrorizmga qarshi kurash” bahonasi bilan cheklangan edi.

“WhatsApp”dan keyingi navbat

Rossiyada axborot platformalarini cheklash tendensiyasi 2025 yil oxirida “WhatsApp”ning deyarli toʻliq sekinlashtirilishi bilan boshlangan edi. Endi esa navbat Rossiya auditoriyasi uchun muhim axborot kanallaridan biri boʻlgan “Telegram”ga kelgan koʻrinadi.

“Downdetector” va “Sboy.rf” platformalari 9 fevraldan buyon Rossiyaning turli hududlaridan minglab shikoyatlarni qayd etmoqda. Muammolar Android, iOS va desktop versiyalarida kuzatilmoqda.

Agar “Telegram” toʻliq bloklansa, bu nafaqat oddiy foydalanuvchilar, balki biznes aloqalari va raqamli reklama bozori uchun ham jiddiy zarba boʻlishi mumkin. Bu holat Rossiya hukumati axborot maydoni ustidan nazoratni kuchaytirish siyosatini davom ettirayotganini koʻrsatadi.