Алимент тўловчиларга енгиллик бўлиши мумкин

Қайд этилишича, ўтган йили алимент масалалари бўйича 70 мингга яқин мурожаат келиб тушган. Мажбурий ижро бюроси алимент ундириш бўйича аризаларни ижрога қабул қилаётган бўлса-да, алимент тўловчиларнинг расмий даромади мавжуд эмаслиги сабаб мурожаатларнинг қарийб 30 фоизи ҳал этилмай қолмоқда.

Шу билан бирга, айрим ҳудудларда ҳокимликлар алимент тўловчиларнинг бандлигини таҳлил қилмаётгани танқид қилинди. Хусусан, қанча шахснинг касби бор, лекин ишсиз экани ёки қанчасини касбга ўқитиш кераклиги бўйича аниқ ҳисоб-китоблар олиб борилмаётгани таъкидланди.

Маълум қилинишича, бандлик бўлимлари ва “маҳалла еттилиги” билан ҳамкорликда бу масалага тизимли ёндашилса, алимент бўйича мурожаатлар сонини икки баробаргача камайтириш мумкин.

Шунингдек, фуқароларни касбга ўқитиш ва ташкилий меҳнат миграцияси асосида чет элда юқори даромадли ишларга юбориш тизими йўлга қўйилгани қайд этилди. Бироқ алимент мажбурияти бор шахслар бу имкониятдан тўлиқ фойдалана олмаяпти. Чунки уларнинг чет элга чиқиши учун 5 йиллик алимент тўловини олдиндан тўлаш ёки алимент олувчининг ёзма розилигини олиш талаб қилинади.

Президент мутасаддиларга ушбу масалани атрофлича ўрганиб, алимент тўловчилар учун қулай ва самарали ечимлар бўйича таклифлар тайёрлаш вазифасини юклади.