Бир гуруҳ оғуфурушлар қўлга олинди

Давлат хавфсизлик хизматининг Тошкент шаҳри бўйича бошқармаси ходимлари томонидан божхона идоралари билан ҳамкорликда Наманган шаҳрида ўтказилган тезкор тадбир давомида аниқланишича, Қирғизистон Республикасининг Жалолобод вилояти Олабуқа туманида яшовчи фуқаро ҳамда Наманган вилоятининг Янгиқўрғон туманида истиқомат қилувчи 2 нафар шахс ўзаро келишиб олган. Улар Ўзбекистонга айланма йўллар орқали олиб кирилган 16 800 дона “Регапен” кучли таъсир қилувчи дори воситаларини 36 минг АҚШ долларига сотаётган вақтида қўлга олинган. 

Тошкент шаҳрида ўтказилган тезкор тадбирда эса, Шайхонтохур туманида яшовчи фуқаронинг ёни ва автомашинаси холислар иштирокида кўздан кечирилганда 15 дона “Регапен” кучли таъсир қилувчи дори воситалари борлиги аниқланиб, тегишли тартибда расмийлаштириб олинган. 

Шунингдек, унинг таниши муқаддам гиёҳвандлик воситалари савдоси билан боғлиқ жинояти учун судланган шахснинг Учтепа туманидаги яшаш хонадони кўздан кечирилганда, 2967 дона “Регапен” дори воситаси борлиги маълум бўлган. Дори воситаси процессуал тартибда расмийлаштириб олинди. 

"ДХХнинг Тошкент шаҳри бўйича бошқармаси ходимлари томонидан божхона идоралари билан ҳамкорликда ўтказилган тезкор тадбирда эса “Фарғона-Тошкент” йўналишида ҳаракатланаётган “Нексия” русумли автомашина Сергели тумани ҳудудида тўхтатилиб, кўздан кечирилди. Унда Фарғона шаҳрида яшовчи фуқарога тегишли 1400 дона “Регапен”, 30 дона “Тропикамид” кучли таъсир қилувчи дори воситалари борлиги аниқланган ва процессуал тартибда расмийлаштириб олинди", 

дейилади хабарда. 

Бундан ташқари, ДХХ Наманган вилояти бўйича бошқармаси ходимлари томонидан божхона идоралари билан ҳамкорликда ўтказилган тезкор тадбирда Наманган шаҳрида истиқомат қилувчи шахснинг “Lacetti” русумли автомашинаси холислар иштирокида кўздан кечирилган. Машинада 6034 дона “Регапен” кучли таъсир қилувчи дори воситалари борлиги аниқланиб, тегишли тартибда расмийлаштириб олинган. Шунингдек, тезкор тадбир давом эттирилиб, мазкур фуқаронинг яшаш хонадонидан ҳам 2800 дона “Регапен” дори воситалари олинган. 

Таъкидлаш лозимки, барча ҳолатларда мусодара қилинган кучли таъсир қилувчи дори воситалари Қирғизистон Республикасидан Ўзбекистонга контрабанда йўли билан олиб келинган. Ҳозирда ҳолатлар юзасидан мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.