Bir guruh ogʻufurushlar qoʻlga olindi

Davlat xavfsizlik xizmatining Toshkent shahri boʻyicha boshqarmasi xodimlari tomonidan bojxona idoralari bilan hamkorlikda Namangan shahrida oʻtkazilgan tezkor tadbir davomida aniqlanishicha, Qirgʻiziston Respublikasining Jalolobod viloyati Olabuqa tumanida yashovchi fuqaro hamda Namangan viloyatining Yangiqoʻrgʻon tumanida istiqomat qiluvchi 2 nafar shaxs oʻzaro kelishib olgan. Ular Oʻzbekistonga aylanma yoʻllar orqali olib kirilgan 16 800 dona “Regapen” kuchli taʼsir qiluvchi dori vositalarini 36 ming AQSh dollariga sotayotgan vaqtida qoʻlga olingan. 

Toshkent shahrida oʻtkazilgan tezkor tadbirda esa, Shayxontoxur tumanida yashovchi fuqaroning yoni va avtomashinasi xolislar ishtirokida koʻzdan kechirilganda 15 dona “Regapen” kuchli taʼsir qiluvchi dori vositalari borligi aniqlanib, tegishli tartibda rasmiylashtirib olingan. 

Shuningdek, uning tanishi muqaddam giyohvandlik vositalari savdosi bilan bogʻliq jinoyati uchun sudlangan shaxsning Uchtepa tumanidagi yashash xonadoni koʻzdan kechirilganda, 2967 dona “Regapen” dori vositasi borligi maʼlum boʻlgan. Dori vositasi protsessual tartibda rasmiylashtirib olindi. 

"DXXning Toshkent shahri boʻyicha boshqarmasi xodimlari tomonidan bojxona idoralari bilan hamkorlikda oʻtkazilgan tezkor tadbirda esa “Fargʻona-Toshkent” yoʻnalishida harakatlanayotgan “Neksiya” rusumli avtomashina Sergeli tumani hududida toʻxtatilib, koʻzdan kechirildi. Unda Fargʻona shahrida yashovchi fuqaroga tegishli 1400 dona “Regapen”, 30 dona “Tropikamid” kuchli taʼsir qiluvchi dori vositalari borligi aniqlangan va protsessual tartibda rasmiylashtirib olindi", 

deyiladi xabarda. 

Bundan tashqari, DXX Namangan viloyati boʻyicha boshqarmasi xodimlari tomonidan bojxona idoralari bilan hamkorlikda oʻtkazilgan tezkor tadbirda Namangan shahrida istiqomat qiluvchi shaxsning “Lacetti” rusumli avtomashinasi xolislar ishtirokida koʻzdan kechirilgan. Mashinada 6034 dona “Regapen” kuchli taʼsir qiluvchi dori vositalari borligi aniqlanib, tegishli tartibda rasmiylashtirib olingan. Shuningdek, tezkor tadbir davom ettirilib, mazkur fuqaroning yashash xonadonidan ham 2800 dona “Regapen” dori vositalari olingan. 

Taʼkidlash lozimki, barcha holatlarda musodara qilingan kuchli taʼsir qiluvchi dori vositalari Qirgʻiziston Respublikasidan Oʻzbekistonga kontrabanda yoʻli bilan olib kelingan. Hozirda holatlar yuzasidan mazkur shaxslarga nisbatan jinoyat ishlari qoʻzgʻatilib, tergov harakatlari olib borilmoqda.