Сунъий интеллект дунё мактабларига оммавий кириб келмоқда

Йирик технологик компаниялар мактабларда сунъий интеллект (AI) жорий этишни кенгайтирмоқда. Бироқ экспертлар ва болалар ҳуқуқларини ҳимоя қилувчи ташкилотлар бу ёндашув ўқувчиларда танқидий фикрлаш кўникмаларини сусайтириши мумкинлигини таъкидламоқда.

2024 йил декабрь ойида Илoн Маскка тегишли xAI компанияси Сальвадор ҳукумати билан ҳамкорликни эълон қилди. Унга кўра, миллиондан ортиқ ўқувчини қамраб олган 5 мингдан зиёд давлат мактабларида Grok чат-боти жорий этилади.

Бундан олдин Microsoft БААдаги 250 мингдан ортиқ ўқувчи ва ўқитувчи учун сунъий интеллект бўйича махсус ўқув дастурини ишга туширган. 

OpenAI эса Қозоғистондаги 165 минг ўқитувчига ChatGPT Edu хизматидан фойдаланиш имкониятини тақдим этган.
АҚШда Флорида штатидаги Майами-Дейд ва Бровард округлари мактаблари Google компаниясининг Gemini чат-ботларини жорий қилди.

Лойиҳа доирасида 100 минг нафар юқори синф ўқувчиси Gemini for Education тизимидан фойдаланиши, 18 минг ўқитувчи эса Google Generative AI for Educators курсини тамомлаб, Gemini Academy сертификатларини олиши режалаштирилган.

Қатор давлатлар мактабларда сунъий интеллектдан фойдаланиш бўйича миллий стратегияларни ишлаб чиқмоқда.

Эстония «AI Leap 2025» дастури доирасида 20 минг ўқувчи ва 3 минг ўқитувчига таълим учун мослаштирилган ChatGPT ва Google Gemini версияларини тақдим этди. Ушбу тизимлар тайёр жавоб бериш ўрнига, муаммоларни босқичма-босқич ҳал қилишга ўргатади.

Исландияда Anthropic компаниясининг Claude модели асосида миллий пилот лойиҳа ишга туширилди. Лойиҳа юзлаб ўқитувчиларга дарс режаларини тузиш ва методик ёрдам олишда кўмаклашмоқда.

Россияда эса 2030 йилгача мактаб ўқувчилари ва ўқитувчиларни қўллаб-қувватловчи миллий сунъий интеллект тизимини яратиш режалаштирилмоқда. Ҳозирча лойиҳа концепцияси ишлаб чиқиш босқичида.

Шу билан бирга, тадқиқотлар сунъий интеллектга ортиқча таяниш танқидий фикрлаш даражасини пасайтириши мумкинлигини кўрсатмоқда.

Microsoft ва Карнеги-Меллон университети ҳамкорлигида ўтказилган тадқиқотга кўра, AIга ҳаддан ташқари боғланиш фойдаланувчиларнинг олинган жавобларни танқидий баҳолаш қобилиятини сусайтиради.

Ушбу хавфларни инобатга олган ҳолда, ишлаб чиқарувчилар янги ечимларни таклиф қилмоқда. Жумладан, OpenAI жорий йилда ChatGPT платформасида талабаларда танқидий фикрлашни ривожлантирувчи «ўқитиш режими»ни ишга туширди.

 Ушбу режим тайёр жавоб бериш ўрнига, фойдаланувчини ечимга босқичма-босқич олиб боради ва билимни чуқурроқ ўзлаштиришга ёрдам беради.