Ҳафта ўртасида ҳарорат кескин кўтарилади

Бугун, 3 март куни Ўзбекистоннинг катта қисмида қор ёғиши давом этади ва ҳаво ҳарорати 0-5 даража совуқ атрофида бўлади. Куннинг иккинчи ярмида Қорақалпоғистон Республикаси ва Хоразм вилоятида қор ёғиши тўхтайди. 

4 мартда Ўзбекистоннинг барча вилоятларида ёғингарчиликсиз об-ҳаво бўлиши кутилмоқда. Фақат Республиканинг айрим тоғли ҳудудларида бироз қор ёғиши мумкин. 

Кечаси ва эрталаб ҳали ҳам совуқ антисиклон таъсири сақланиб туради, ҳарорат 2-7 даража совуқ атрофида бўлади. Кундузи антисиклон Республика ҳудудидан аста-секин чекина бошлайди. Ҳарорат 4-7 даража илиққача кўтарилади, аммо бу март ойи боши учун меъёрдан нисбатан паст. 

Республиканинг айрим жойларига туман тушиши мумкин, 5-6 март кунлари Ўзбекистоннинг барча ҳудудлари бўйича ёғингарчиликсиз об-ҳаво бўлиши кутилмоқда. 

7 мартда Республика бўйича баъзи жойларда (Фарғона водийсидан ташқари) яна ёмғир кўринишидаги ёғингарчилик бўлиши кутилмоқда.  Фақат Ўзбекистоннинг шимолида — Устюртда ва Орол бўйи ҳудудларида ёмғир қорга айланиши мумкин. 

Ҳафта ўртасидан ҳарорат жадал кўтарила бошлайди ва  6-7 март кунларига келиб, кечалари 5-8 даража илиқни, кундуз кунлари 14-17 даража илиқни, жанубда 20-22 даража илиққача ҳарорат кўтарилади. 

3 март ва 7 март кунлари Республика бўйича баъзи жойларда шамол тезлиги 17-22 м/с гача кучаяди, айрим жойларда баъзида 23-25 м/с гача кучайиши мумкин. Тошкентда 3 мартда вақти-вақти билан қор ёғади. Ҳарорат 0-2 даража совуқ бўлади. 

4-6 март кунлари ёғингарчилик кутилмайди. 7 мартда кечга томон ёмғир ёғиши мумкин. Ҳарорат 4 мартда кечаси 3-5 даража совуқ,  кундузи 5-7 даража илиқ бўлади. 5-7 мартда ҳарорат кечалари 4-7 даража илиққача, кундуз кунлари 14-17 даража илиққача кўтарилади.