Украинадаги урушда асирликка тушган ўзбекистонликлар сони ортмоқда. Бизникилар ҳамон сукутда

Унда ёзилишича, ўзбекистонлик ёлланма аскарлар рўйхати эълон қилинганидан сўнг мамлакатда фуқароларнинг жанговар ҳаракатлардаги иштироки тўғрисидаги маълумотлар текширилиши бошлангани ва ёлланма аскарларга нисбатан жиноий таъқиб кучайтирилганига қарамай, Россия уларни ёллаш бўйича ҳаракатларини янада фаоллаштиришда давом этмоқда.  

Маълум бўлишича, Украинанинг Россия Қуролли Кучларидаги манбалари Россия армияси билан шартнома имзолаган барча шахслар ҳақида маълумот олмоқда. 2025 йилда Россия 902 нафар Ўзбекистон фуқаросини урушга жалб этишга улгурган. Бу урушга жалб этиш одамларнинг ўз хоҳиши билан эмас, балки Россияда давлат хоҳиши билан амалга ошмоқда.

Федерация урушга ёллаш бўйича эски усурллатдан фойдаланмоқда. Яъни Россияга меҳнат муҳожири сифатида келган Ўзбекистон фуқаролари юқори маош тўланадиган иш баҳонаси билан - масалан, қурилишларда ёки армиянинг орқа фронт бўлинмаларида ишга таклиф қилинмоқда. Уларга асосий рағбатларидан бири Федерация фуқаролигини ваъда қилмоқда.

Лойиҳага кўра, Россия қамоқхоналарида жазо муддатини ўтаётганларга таҳдидлар,  руҳий босим ва  шантаж орқали урушда қатнашишга мажбурлашмоқда. 

Шу билан бирга лойиҳа маълумотларига кўра, 2025 йил 5 июнь куни Курск вилоятидаги    "Постоялые Дворы " полигонида Ўзбекистон Республикаси Қуролли Кучлари делегациясининг норасмий ташрифи бўлиб ўтган. Делегацияга Ўзбекистон мудофаа вазири ўринбосари полковник Алишер Норбоев бошчилик қилган. Делегацияга Ленинград ҳарбий округи ҳарбий хизматчиларига жанговар тайёргарлик элементлари бўйича маъруза қилган.

PARADIGMA.UZ мазкур хабарга аниқлик киритиш мақсадида Ўзбекистон Мудофаа вазирлиги билан боғланди.

Вазирлик матбуот хизматига кўра, бу бўлмаган гап. Вазир ўринбосари Алишер Норбоев делегацияси Россия ҳарбий полигонига ташриф буюрмаган.

Шунингдек, PARADIGMA.UZ мухбири Украинадаги урушда асирликка тушган ўзбекистонликларни ватанига қайтариш бўйича берган саволига эса бу иш билан Ташқи ишлар вазирлиги шуғулланишини айтди.

PARADIGMA.UZ мухбири шу масала бўйича Ташқи ишлар вазири Аҳрор Бурҳонов билан боғланди.

Бурҳонов ушбу масалани суриштириб, батафсил маълумот беришини айтди.

PARADIGMA.UZ вазирлик хабарини кутади.

 Эслатиб ўтамиз, аввалроқ жорий йилнинг апрель ойида Украина разведкасига тегишли ушбу лойиҳа Россия томонидан урушга ёлланган 1110 нафар Ўзбекистон фуқароларининг рўйхатини эълон қилган эди.

Ушбу рўйхатга кўра, исми келтирилган шахсларнинг камида 109 нафари урушда ҳалок бўлгани ва Россия томонидан урушда қатнашаётган ўзбекистонликларнинг энг ёши 21 ёш энг каттаси эса 62 ёш эканлиги айтилган эди.

Ушбу хабардан кейин Ўзбекистон жамиятида кенг эътирозлар келиб чиққан эди. Мазкур ҳодисани ёритган ўзбек ОАВ ва Telegram каналлари админларига Оммавий коммуникациялар масалалари бўйича марказ номидан ушбу постни 24 соат ичида ўчириб ташлаш талаби қўйила бошлади.

Кейинчалик, ҳукуматга тегишли “Pressuzb” Telegram канали бу хабарни сохта ва бу каналда ҳеч қандай ID рақам мавжуд эмаслигини ёзиб чиқди. 

“Хабарнома юборилган ҳисоблар текширилганда, уларнинг сохта профиль экани маълум бўлди.

Шунингдек, марказ масъуллари билан боғланилганда, бу борада марказ томонидан ҳеч қандай хабарнома юборилмагани аниқланди”, — дейилади хабарда.

Шундан сўнг Ўзбекистон Ташқи ишлар вазирлиги расмий муносабат чиққан эди. Ушбу рўйхат бўйича текширув ишлари олиб бошланганини маълум қилган эди. 

Шу воқеалар фонида Украинада асирликка тушган ўзбекистонликлар президент Шавкат Мирзиёевга видеомурожаат йўллаб, уларни алмашинув йўли билан асирликдан тезроқ қайтаришга кўмаклашишини сўраган эди.