Ирландия бош вазири: “Фаластинни тан олмаган давлатлар позициясини ўзгартириши зарур”

У икки давлатли ечимни ягона ҳақиқий йўл сифатида баҳолаб, «Фаластин ва Исроилга тинч ва адолатли келажак тақдим этадиган йўл бу — икки давлатли ечим», деди. Бироқ у вазиятнинг ёмонлашиб бораётганини ва барқарор тинчлик имконияти камайиб кетганини таъкидлади.

Мартин Ирландиянинг ўзи 24 йил давом этган ички можарони бошидан кечирганини эслатиб, ҳатто энг қийин паллаларда ҳам умидни йўқотмаслик ва мулоқотни давом эттириш зарурлигини қайд этди.

У Ғазо халқининг дардини чуқур ҳис қилишини айтди ва Исроилнинг ҳаракатларини қоралади:

«65 мингдан зиёд инсон, жумладан 20 мингдан ортиқ бола ҳалок бўлди. Озиқ-овқат қуролга айланди, очлик тарқалди. Шифохоналар, мактаблар, тарихий мерос объектлари йўқ қилинди. Ҳатто шифокорлар, гуманитар ташкилотлар ходимлари ва журналистлар ҳам нишонга олинди. Бу ҳолат кўпчилик томонидан геноцид сифатида аталмоқда», — деди у.

Бош вазир сўзининг якунида Фаластинни аллақачон тан олган давлатларга миннатдорлик билдириб, қолганларини ҳам шундай қадам ташлашга чақирди:

«Ҳозир ҳаракат қилиш вақти. Агар бугун икки давлатли ечимни сақлаб қолмасак, эртага бундай имконият умуман қолмаслиги мумкин. Биз келажак авлодларга шундай мерос қолдиришга ҳақли эмасмиз».