Ғазо ҳақидаги “NAZA” фильми ижодкорлари фуқароликдан маҳрум қилинади – Нетаняҳу

Бош вазир Биньямин Нетаняху 16 сентябрь куни Исроил аскарларига туҳмат қилган ҳар қандай шахснинг фуқаролигини бекор қилиш тўғрисида қонун қабул қилишга ваъда берди. Бу ҳақда Reuters нашри ёзди.

Бу аскарлар томонидан Ғазо тинч аҳолиси ўлдирилиши ҳақидаги “NAZA” ҳужжатли фильмининг исроиллик режиссёрларига қарши навбатдаги таҳдиддир.

Исроиллик журналистлар Ювал Абраҳам ва Рейчел Шор томонидан суратга олинган “NAZA” фильми Исроилнинг Ғазодаги нишонга олиш қарорларида аҳолининг оммавий ўлими мунтазам равишда ҳисобга олинганини даъво қилади. Нетаняху ва ҳарбийлар эса буни рад этмоқда.

Ўтган ҳафта Венеция кинофестивалида йирик мукофотни қўлга киритган ушбу фильм разведка ходимлари ва аскарлар билан ўтказилган аноним интервьюлар асосида яратилган.

Бу Исроилда кескин эътирозларга сабаб бўлди, ҳарбийлар унга алоқадор бўлган шахсларга нисбатан ҳуқуқий чораларни кўриб чиқмоқда. Шунингдек, Исроилда 27 октябрда бўлиб ўтадиган сайловлар олдидан юзага келган кескин сиёсий муҳитга ҳам таъсир кўрсатди: сўровларга кўра, Нетаняхунинг ўнг қанот коалицияси мағлуб бўлиши мумкин.

16 сентябрь куни Нетаняху Исроил аскарларига етказилган “улкан зарар”ни бартараф этишга қаратилган иккита қонун лойиҳасини илгари суришга ваъда берди.

“Биринчиси — (Исроил) аскарларига туҳмат қилган ҳар қандай шахснинг фуқаролигини бекор қилиш, иккинчиси эса уларнинг чўнтагига зарба бериш ва туҳмат қилгани учун ундирилиши мумкин бўлган қонуний товон пули миқдорини 20 бараварга ошириш”, – деди Нетаняху.

Нетаняху қонун лойиҳаларини таклиф қилишда учта ҳолатни келтириб ўтди:

• (Исроил) офицерлари ва аскарларини ҳарбий жиноятчилар сифатида тасвирлаган “NAZA” фильми;
• сўлчи собиқ генерал, ҳозирда сиёсатчи бўлган Яир Голаннинг 2025 йилдаги “соғлом ақлга эга мамлакат болаларни хобби сифатида ўлдирмайди” деган сўзлари;
• 2024 йилда ҳарбий ҳуқуқшунос офицер томонидан аскарларнинг ғазолик маҳбусни қийноққа солаётгани акс этган видеонинг ошкор қилиниши.

NAZA киноижодкорлари исроилликларнинг ушбу ҳужжатли фильмни томоша қилиши ва унда илгари сурилган воқеалар баёни устида бош қотириши керак, деб ҳисоблашларини айтишмоқда.

Ғазо соғлиқни сақлаш расмийларининг маълум қилишича, Исроилнинг Ғазонинг катта қисмини вайронага айлантирган ҳарбий кампанияси оқибатида 73 мингдан ортиқ фаластинлик, асосан тинч аҳоли вакиллари ҳалок бўлган.

Уруш ҲАМАСнинг 2023 йил 7 октябрь куни Исроилга уюштираган ҳужуми ортидан келиб чиққан бўлиб, Исроил маълумотларига кўра, унда 1200 киши, асосан тинч аҳоли вакиллари ҳалок бўлган.