“Ғазо бизники”: Исроил вазири ҳар кеча Ғазода 30–40 нафар фаластинликни ўлдиришга чақирди

Исроилнинг ўта ўнгчи миллий хавфсизлик вазири Итамар Бен-Гвирнинг сўзларига кўра, Исроил кучлари Ғазода ҳар кеча “30 ёки 40 кишини ўлдириши” ва “айнан ўша пайтда хавф туғдирадиганлар” билан чекланиб қолмаслиги керак. Бу ҳақда “Ал-Жазира” нашри хабар берди.

Бен-Гвир мазкур фикрларни Исроил 2023 йил октябрь ойида ҲАМАС бошчилигидаги ҳужумлардан сўнг Ғазода асирликда сақланган собиқ исроиллик Ром Браславский билан суҳбатда билдирди.

“У ерда яшашга нолойиқ одамлар бор. Улар яшамаслиги керак. Улар ҳатто одам ҳам эмас”, – дея қўшимча қилди Бен-Гвир Ғазодаги фаластинликларни ўлдиришга чақирар экан.

Бу сўзлар Бош вазир Бенямин Нетаняҳунинг коалицион ҳукуматида ўрин олган ҳамда Исроил полицияси ва қамоқхона хизматларини назорат қиладиган Бен-Гвирнинг кўплаб кескин баёнотларининг сўнггисидир.

Мамлакат 27 октябрь куни бўладиган сайловларга яқинлашар экан, ўта ўнгчи вазирнинг Исроилдаги нуфузи ортиб бормоқда.

Бен-Гвир Браславскийга Нетаняҳунинг жорий “сулҳ” шароитида Ғазодаги ҳарбий зарбаларни қисқартириш қарорига қўшилмаслигини, аксинча, нафақат фаол таҳдид деб ҳисобланган шахсларга, балки ундан кенгроқ доирадаги нишонларга қарши ҳужумларни қайта бошлаш тарафдори эканлигини айтди.

Шунингдек, Бен-Гвир Браславскийга исроилликларга қарши қонли ҳужумларда айбдор деб топилган фаластинлик маҳбуслар қатл этилса, бу жараёнда шахсан иштирок этиши учун рухсат беришга ҳаракат қилишини айтди. Яқинда Исроилда ўлим жазоси тўғрисидаги қонун қабул қилинган эди.

“Жаноб вазир, сизга шахсий илтимосим бор. Сизга чин дилдан, кўзингизга тик қараб айтаяпман. Менга уларни осишга рухсат беринг. Менга арқон эмас, қурол тепкиси керак. Исроил давлатидаги ҳар бир террорчини ўз қўлларим билан қатл қиламан” — деди Браславский Бен-Гвирга.

“Буни амалга ошириш учун бутун дунёни остин-устун қиламан. Ваъда бераман, буни амалга ошириш учун қўлимдан келган барча ишни қиламан”, — деб жавоб берди Бен-Гвир.

“Ғазо бизники”

Суҳбатда Бен-Гвир фаластинликларни Ғазодан бутунлай тарк эттириб, Исроилни ушбу ҳудудда янги аҳоли пунктларини қуришга чақирди. Шунингдек, “бутун Ғазони ўзимизники деб билишини” айтди.

Халқаро ҳуқуқшунослар бундай оммавий, мажбурий ёки уюшган эмиграция этник тозалашга тенг бўлишидан огоҳлантирган.

Ғазо Соғлиқни сақлаш вазирлиги маълумотларига кўра, октябрь ойида “ўт очишни тўхтатиш” кучга кирганидан сўнг ҳам Исроил зарбалари оқибатида Ғазода 1250 дан ортиқ одам ҳалок бўлган.

Бен-Гвир қонли ҳужумларни амалга оширишда айбдор деб топилган фаластинликлар учун ўлим жазосини стандарт қилиб белгилашни ёқлаб келади. Бундан ташқари, Исроил қамоқхоналаридаги фаластинлик маҳбусларнинг шароитларини қасддан ёмонлаштиргани билан ҳам мақтанган.

Ушбу фаолияти халқаро танқидларга сабаб бўлса-да, унга қарши жиддий оқибатларга олиб келмаган. Бен-Гвир Буюк Британия ва айрим Европа Иттифоқи давлатлари томонидан санкцияга учраган, аммо бу унинг хатти-ҳаракатларига таъсир кўрсатмаган.