G‘azodagi urushni “genotsid” deb atagan jarroh AQSH Kongressiga nomzod bo‘ldi

AQSH armiyasining Iroq va G‘azoda xizmat qilgan vakili, shuningdek, 11-sentyabr teraktlarida jabrlangan qutqaruvchilarni davolagan travmatolog jarroh seshanba kuni Nyu-Jersi shtatining 12-kongress okrugi uchun Demokratik partiyadan nomzodlikni qo‘lga kiritdi.

Asli kelib chiqishi misrlik bo‘lgan Adam Hamaviy 3-noyabrda bo‘lib o‘tadigan umumiy saylovlarda Respublikachilar partiyasi praymerizi g‘olibi Greg Meleni mag‘lub etishi kutilmoqda.

Bu okrug demokratlar uchun “ishonchli” hudud hisoblanadi. 2024-yil noyabrdagi prezidentlik saylovlarida demokrat Kamala Harris Nyu-Jersi shtatining 12-kongress okrugida Donald Trampni 23 foizlik farq bilan ortda qoldirgan edi.

“G‘azoda genotsid sodir bo‘lmoqda”

2024-yilda Hamaviy G‘azoda jabr ko‘rgan tinch aholiga tibbiy yordam ko‘rsatish uchun ko‘ngilli bo‘lib bordi.

“Men guvoh bo‘lgan narsa urush emas, urushdan-da ancha dahshatli edi. Men ilgari bunday miqyosdagi qirg‘inni ko‘rmaganman. Uni faqat genotsid deb atashim mumkin”, — dedi u seshanba kuni.

Bu gaplar esa Isroil tarafdori bo‘lgan saylovchilarning g‘azabini qo‘zg‘atdi.

Hamaviyni senator qo‘llab-quvvatladi

Hamaviyning AQSh armiyasidagi xizmati va bir qancha harbiy mojarolarda, jumladan, Iroqda amerikaliklarga tibbiy yordam ko‘rsatgani uning saylovdagi g‘alabasining asosiy omillaridir.

Uning yutuqlari qatoriga Illinoys shtatidan demokrat senator Tammi Dakvortning hayotini saqlab qolishga yordam bergani ham kiradi. Dakvort 2004-yilda Iroqdagi janglar paytida o‘zining “Black Hawk” vertolyotiga raketa granatasi kelib urilishi oqibatida ikkala oyog‘idan ayrilgan edi.

Illinoys shtatidan Kongressga, so‘ngra Senatga saylangan Dakvort Nyu-Jersidagi saylovda Hamaviy nomzodini qo‘llab-quvvatladi.

Hamaviy iste’foga chiqayotgan amaldagi kongressvumen Bonni Uotson Koulmanning o‘rniga nomzodlikni qo‘lga kiritish uchun Demokratlar partiyasidan bo‘lgan boshqa 12 nafar raqibini mag‘lub etdi.