Исроил Ливанга яна ҳужумлар уюштирди. Қурбонлар бор

Ҳужумлар оқибатида ҳозирча умумий беш киши ҳалок бўлгани маълум.

Ливан Миллий ахборот агентлигининг хабар қилишича, Исроил ҳарбий самолётлари ярим тундан сўнг Набатия ал-Фавқага, эрталаб эса Арабсалим шаҳрига зарбалар берган. Натижада уч киши ҳалок бўлган.

Дейр аз-Заҳроний ва Дуэйр шаҳарларига уюштирилган дрон ҳужумлари яна икки кишини нобуд қилган.

Бу воқеа АҚШ расмийлари Эрон томонидан қўллаб-қувватланадиган “Ҳизбуллоҳ” жангари гуруҳи ўт очишни тўхтатиш бўйича келишувни янгилаганини эълон қилганидан бир кун ҳам ўтмай юз берди.

Пайшанбадан жумага ўтар кечаси икки томон ўртасида бир қанча тўқнашувлар содир бўлиб, АҚШнинг Эрон билан тузган вақтинчалик тинчлик битимини хавф остида қолган эди.

Жума куни Исроил ҳарбийлари мамлакат жанубида тўрт нафар аскари ҳалок бўлганини маълум қилгач, Исроил миллий хавфсизлик вазири “бутун Ливан ёниши керак” деб баёнот берди.

“Исроиллик онанинг ҳар бир томчи кўз ёши учун минглаб ливанлик оналар йиғлаши шарт”, — деб ёзди Итамар Бен-Гвир ижтимоий тармоқда.