Россиянинг Украинанга зарбалари оқибатида тўрт киши ҳалок бўлди

2022 йил февраль ойида Россиянинг кенг кўламли босқини натижасида бошланган урушнинг 4,5 йилдан ортиқ вақти ўтиб, фронтдаги жанглар деярли тўхтаб қолган.

Москва ҳаво ҳужумларини кучайтириб, корхоналар ва портлардан тортиб логистика марказларигача бўлган иқтисодий нишонларга зарба бермоқда.

Ҳар икки томон ҳам можарода тинч аҳолини нишонга олганини рад этган.

Украина расмийларининг 22 сентябрь куни маълум қилишича, Москва бир вақтнинг ўзида Днепропетровск вилоятининг жануби-шарқидаги Днепр, Кривой Рог ва Павлоград шаҳарларидаги саноат корхоналарига зарба берган.

Вилоятда машинасозлик, пўлат ишлаб чиқариш ва бошқа йирик саноат тармоқлари жойлашган.

Россия тўртта туманга ракета, дрон ва артиллериядан ҳужум уюштирди, оқибатда Днепрда тўрт киши ҳалок бўлди ва олти киши яраланди.

Украина ҳарбий-ҳаво кучлари маълумотларига кўра, Россия ҳужумида номаълум миқдордаги «Оникс» кемаларга қарши ва баллистик ракеталари, шунингдек, тўртта қанотли ракета ва 212 та дрон қўлланилган.

Россиянинг энергетика объектига уюштирган ҳужуми шимолий Чернигов вилоятидаги 100 мингга яқин истеъмолчининг электр таъминотини узиб қўйган.

Украина зарбалари

Ўз навбатида Украина ҳам Россияга ҳужумларни кучайтириб, энг йирик онлайн чакана савдо тармоқлари ва нефтьни қайта ишлаш заводларини нишонга олмоқда.

Украина дронлари Россиянинг Волга дарёси бўйидаги Самара вилоятида фуқаролик объектларига зарба берган, оқибатда бир киши ҳалок бўлиб, тўрт киши яраланган.

Россия Мудофаа вазирлиги ҳаво ҳужумига қарши мудофаа бўлинмалари тунда Россиянинг турли ҳудудлари устида 297 та дронни йўқ қилганини маълум қилди.