Каспийдаги фожиадан сўнг Қозоғистон армиясида катта ўзгариш

Қозоғистонда ҳарбий ислоҳот доирасида муддатли ҳарбий хизматни икки босқичда ташкил этиш ва учувчисиз тизимлар қўшинларини шакллантириш режалаштирилмоқда.

Ҳужжат давлатнинг ҳарбий тизими самарадорлигини оширишга қаратилган институционал ўзгаришларни назарда тутади. Жумладан, Қуролли кучларнинг тузилмаси ва таркибини қайта кўриб чиқиш, бошқарув ҳамда мудофаа режалаштириш тизимини такомиллаштириш, учувчисиз тизимлар қўшинларини шакллантириш ва армиянинг асосий бўғинларини мустаҳкамлаш режалаштирилган.

Муддатли ҳарбий хизмат икки босқичда ўтайди

Ислоҳотнинг муҳим йўналишларидан бири муддатли ҳарбий хизматни икки босқичга ажратишдир. Унга кўра, чақирилувчилар дастлабки олти ой давомида ўқув марказларида тайёргарликдан ўтади. Кейинги олти ойда эса бевосита ҳарбий қисмларда хизмат қилади. Бу даврда жанговар тайёргарлик ва бўлинмалар таркибида вазифаларни бажаришга алоҳида эътибор қаратилади.

Шунингдек, ҳарбий хизматчилар хавфсизлигини таъминлаш ва уларнинг ҳуқуқларини ҳимоя қилиш чоралари кучайтирилади. Ҳарбий маслаҳатчилар институти ва ҳарбий хизматчилар ҳуқуқлари бўйича вакил лавозимини жорий этиш, низомга зид муносабатларнинг олдини олиш ҳамда ҳарбий интизомни мустаҳкамлаш режалаштирилган.

Ислоҳотнинг ташкилий ишлари 2026 йил охиригача, асосий ўзгаришлар эса 2027 йилда амалга оширилади. Президент Мудофаа вазирлигини текшириш бўйича комиссия ишини йил охиригача якунлашни топширди. Ислоҳот ижросини ҳукумат ва Хавфсизлик кенгаши мувофиқлаштиради.

Ислоҳот Каспийдаги фожиадан кейин бошланди

Президент Қозоғистон армиясини ислоҳ қилиш вазифасини Каспий денгизидаги машғулотлар вақтида 14 нафар ҳарбий хизматчи ҳалок бўлган фожиадан кейин қўйган.

Ҳодисадан сўнг Тўқаев Мудофаа вазирлигининг бир қатор раҳбарларини лавозимидан озод этган. Улар орасида вазир Даурен Косанов, мудофаа вазирининг биринчи ўринбосари – Бош штаб бошлиғи Каниш Аубакиров, вазир ўринбосари Алмаз Жумакиев ва Ҳарбий-денгиз кучлари қўмондони Канат Ниязбеков бор.

Ҳарбий хизматчиларнинг ҳалок бўлиши билан боғлиқ иш доирасида олти нафар мансабдор шахс ҳам қўлга олинган. Улар орасида Қозоғистон Ҳарбий-денгиз кучлари бош қўмондонининг штаб бошлиғи – биринчи ўринбосари, икки ҳарбий қисм командири, денгиз пиёдалари ротаси ва катер командирлари, шунингдек, Ҳарбий-денгиз кучларининг собиқ бош қўмондони Канат Ниязбеков бор.