Непал–Хитой чегарасида кучли сел: 160 дан ортиқ киши ҳалок бўлди

Фалокат 26 август куни Непалнинг Хитой назоратидаги Тибет билан чегараси яқинидаги тоғли ҳудудларда содир бўлган. Кучли сув ва лой оқими уйлар, йўллар ва кўприкларни вайрон қилган. Айрим қишлоқлар деярли бутунлай лой остида қолган.

Юзлаб сайёҳлар бедарак йўқолди

Непал Туризм вазирлиги маълумотларига кўра, 403 нафар сайёҳдан дарак йўқолган. Улардан 341 нафари хорижий фуқаролар. Бедарак йўқолганлар орасида Ҳиндистон, АҚШ, Австралия, Буюк Британия ва Канада фуқаролари ҳам бор. Шунингдек, 28 нафар полиция ходими ҳам бедарак йўқолган
Хусусан, АҚШнинг 47 нафар фуқароси бедарак йўқолгани ҳақида хабар берилган. Австралиядан 34 нафар, Буюк Британиядан 33 нафар ва Канададан 24 нафар фуқаро бедараклар рўйхатида қайд этилган.
Фалокат машҳур Кайлаш-Мансаровар зиёрат йўналиши ҳамда Лангтанг миллий боғи яқинида содир бўлгани сабабли ҳудудда кўплаб сайёҳлар бўлган.

Хитой томонида ҳам қурбонлар бор

Сел Хитойнинг Тибет автоном ҳудудидаги Гьиронг (Gyirong) уездига ҳам жиддий зарар етказган.
Хитой расмийлари ҳудудда камида 3 киши ҳалок бўлганини, 558 киши эса бедарак йўқолганини маълум қилган. Бедараклар орасида 260 нафар хорижлик бор.
Гьиронг портида лой кўчкиси юз бериб, йўллар ва инфратузилмага зарар етган. Хитой ҳукумати қидирув-қутқарув ишларини кучайтирган.

Фалокатга нима сабаб бўлди?

Дастлаб ҳодиса зилзила натижасида юзага келган кўчки билан боғлиқ бўлиши мумкинлиги айтилган. Кейинги таҳлиллар эса музлик ва тоғ жинсларининг қулаши натижасида дарё ўзани тўсилиб қолгани, сўнгра катта миқдордаги сув қуйи оқимга отилиб чиққанини кўрсатмоқда. 
Непалнинг табиий офатларни бошқариш идораси сунъий йўлдош маълумотлари чегара ҳудудида «қор-тош кўчкиси» содир бўлганини кўрсатганини билдирган. Тоғ жинслари ва музлик массасининг дарёни тўсиб қолиши кучли сув оқимига сабаб бўлган бўлиши мумкин.
АҚШ Геология хизмати эса дастлаб қайд этилган сейсмик ҳаракат зилзила эмас, балки кўчкининг ўзи билан боғлиқ бўлганини билдирган. 
Қидирув-қутқарув ишлари давом этмоқда
Непал армияси ва полицияси ҳудудга қидирув-қутқарув гуруҳларини юборган. Бироқ тоғли ҳудуддаги ёмон об-ҳаво, вайрон бўлган йўллар ва алоқа узилиши қутқарув ишларини қийинлаштирмоқда. Айрим ҳудудларга вертолётларни қўндириш ҳам сув сатҳи юқорилиги сабабли мушкул бўлган. 
Хитой томонида ҳам қутқарув ишлари олиб борилмоқда. Расмийлар тоғларда яна кўчкилар ва дарёнинг қайта тўсилиши натижасида янги сел юзага келишидан хавотирда.
Қурбонлар ва бедарак йўқолганлар сони ҳали якуний эмас. Қидирув ишлари давом этаётгани сабабли бу рақамлар яна ўзгариши мумкин.