«Нетаньяху, сен ақлдан озибсан» – Трамп

 Бу ҳақда Axios нашри манбаларига таяниб хабар берди. 

Нашр маълумотларига кўра, суҳбат давомида Трамп Нетаньяхунинг ҳаракатларидан қаттиқ норози бўлган ва унинг Ливандаги ҳарбий операцияларни кенгайтириш режалари АҚШнинг минтақадаги дипломатик ташаббусларига зарар етказаётганини айтган. 

Манбаларнинг таъкидлашича, Трамп суҳбат чоғида Нетаньяхуга нисбатан қаттиқ иборалар ишлатиб, уни «ақлдан озган» деб атаган ҳамда Исроилнинг ҳаракатлари туфайли мамлакат халқаро майдонда тобора кўпроқ танқидга учраётганини билдирган. 

Эрон билан музокаралар хавф остида қолган

Axios маълумотига кўра, Вашингтон Исроилнинг Ливандаги янги зарбалари АҚШ ва Эрон ўртасида давом этаётган музокараларни издан чиқаришидан хавотир билдирган. Теҳрон Исроилнинг ҳаракатлари давом этса, мулоқот жараёнидан чиқиб кетиши мумкинлигини билдирган эди. 

Шундан кейин Трамп Truth Social ижтимоий тармоғида Эрон билан музокаралар давом этаётганини маълум қилди. 

Бейрутга зарба бериш режаси бекор қилинган

Axios ва бошқа нашрлар тарқатган маълумотларга кўра, мазкур телефон суҳбатидан сўнг Исроил томони Бейрутга зарба бериш бўйича режаларни амалга оширмасликка қарор қилган. Исроил расмийларидан бири ҳам режалаштирилган ҳужум бекор қилинганини тасдиқлаган.