Трамп Исроилнинг Сурияга зарбасини тўхтатди

Бу ҳақда Исроилнинг 13-канали хабар берди.

Хабарга кўра, Вашингтон Суриядаги вазият янада кескинлашиб кетишидан хавотирланган.

Трамп аввал ҳам Бош вазир Биньямин Нетаньяху билан мулоқотда Исроил қўшинларини Суриядан олиб чиқиш ёки уларнинг ҳудуддаги ҳозирлигини қисқартиришга чақирган. 

Axios ва Исроил манбаларига кўра, Трамп Исроилнинг Суриядаги ҳарбий ҳозирлиги янги кескинликка олиб келиши мумкинлигидан хавотир билдирган.

Хабарлар АҚШ, Исроил ва Сурия ўртасида хавфсизлик масалалари бўйича дипломатик музокаралар давом этаётган бир пайтда тарқалди.

Шунингдек, АҚШ Суриянинг собиқ ҳукумати давридан қолган ядровий материаллар билан боғлиқ масалани ҳал қилиш бўйича ҳам дипломатик саъй-ҳаракатларда иштирок этмоқда. 

АҚШ воситачилигида Суриядаги махфий ядровий объектда сақланаётган материалларни хавфсиз олиб чиқиш бўйича келишувга эришилгани ҳақида хабар берилган.