Исроил ҳарбий самолётлари Ливан жанубига ҳужум уюштирди

Ливан Миллий ахборот агентлигининг маълум қилишича, 7-сентябрь куни эрта тонгда Исроил ҳарбий самолётлари Ливан жануби Кфар Реман шаҳарчасидаги турар жой биносига зарба бериши натижасида тўққиз киши, жумладан, икки нафар бола вафот этган, яна беш киши жароҳатланган. Бу ҳақда Ал-Жазира нашри ёзди.

Шунингдек, Исроил армияси Ливан жанубидаги Дейр аз-Заҳроний шаҳрида аҳоли яшайдиган ҳудудга мажбурий эвакуация буйруғи берганидан сўнг, тунда зарба берди. Ҳарбийларнинг таъкидлашича, улар “Ҳизбуллоҳ” объекти яқинидаги бинога нишон олган.

Бу ҳужумлар Исроилнинг Набатия туманидаги Араб Салим шаҳрига уюштирган ҳаво ҳужумлари оқибатида камида етти киши ҳалок бўлиб, яна 20 киши яраланганидан бир кун ўтиб содир бўлди.

Июн ойида АҚШ воситачилигида Исроил ва Ливан ўртасида “тажриба зонаси” келишувига эришилганига қарамай, ҳужумлар давом этмоқда.

“Ал-Жазира” мухбири Зайна Ходрнинг сўзларига кўра, тажриба зоналари Ливан армияси томонидан “Ҳизбуллоҳ”ни қуролсизлантириш ва исроилликлар томонидан ҳудудни тарк этиш учун синов майдони бўлиб хизмат қилиши кўзда тутилган.

Бироқ Исроил Ливан жанубидаги ўнлаб қишлоқларни ҳамон эгаллаб тургани ҳолда қўшинларини олиб чиқиб кетишдан бош тортган ва бу дипломатик жараённинг “турғунликка” юз тутишига олиб келган.

Ливан Соғлиқни сақлаш вазирлигининг маълум қилишича, март ойи бошида можаро кучайганидан буён Исроилнинг Ливанга берган зарбалари оқибатида 4350 дан ортиқ киши ҳалок бўлган ва 12 300 дан зиёд одам жароҳатланган.

Вазирликнинг сўнгги ҳисоботида қайд этилишича, 2-мартдан бери Исроил Ливан тез ёрдам гуруҳларига 179 марта ҳужум қилган, бунинг натижасида 135 нафар тиббиёт ходими ҳаётдан кўз юмган.