Рамзан Қодировнинг соғлиғи оғирлашди: Кремл янги раҳбар вариантларини муҳокама қилмоқда — Украина разведкаси

Бу ҳақда Украина Мудофаа вазирлиги Бош разведка бошқармасидаги манбага таяниб, Ukrinform агентлиги хабар берди.

Манба маълумотларига кўра, шифокорлар Қодировнинг аҳволи яхшиланиши бўйича ижобий прогноз бермаяпти. Айтилишича, у ҳозирда ўзининг шахсий шифохонасида даволанмоқда. Сўнгги кунларда унинг ҳузурига яқин оила аъзолари, шунингдек, хорижда истиқомат қиладиган қариндошлари келган.

Кремлда фаол муҳокамалар

Украина разведкаси маълум қилишича, Қодировнинг соғлиғи билан боғлиқ ҳолатлар Москвада ҳам жиддий муҳокамаларга сабаб бўлган. Хусусан, Кремлга яқин доираларда Чеченистон раҳбарлигини ким қўлга олиши мумкинлиги ҳақида маслаҳатлар кучайган.

Маълумотларга кўра, эҳтимолий номзодлар сифатида Чеченистон парламенти раиси Магомед Даудов, «Ахмат» махсус бўлинмаси қўмондони Апти Алаудинов ҳамда Рамзан Қодировнинг тўнғич ўғли — Ахмат Қодиров кўриб чиқилмоқда.

Ахмат Қодировнинг тезкор кўтарилиши

Айни пайтда 20 ёшда бўлган Ахмат Қодиров Чеченистон ҳукумати раиси ўринбосари вазифасини бажарувчи этиб тайинланган. Шу билан бирга, у республика спорт вазири лавозимини ҳам сақлаб қолган.

Бундан ташқари, у Грозний шаҳрининг фахрий фуқароси унвонига ҳамда Чеченистоннинг энг олий мукофоти ҳисобланган Ахмат Қодиров орденига сазовор бўлган.

Таҳлилчиларга кўра, унинг қисқа муддат ичида юқори лавозимларга кўтарилиши эҳтимолий сиёсий ворислик сценарийси билан боғлиқ бўлиши мумкин.