Ramzan Qodirovning sogʻligʻi ogʻirlashdi: Kreml yangi rahbar variantlarini muhokama qilmoqda — Ukraina razvedkasi

Bu haqda Ukraina Mudofaa vazirligi Bosh razvedka boshqarmasidagi manbaga tayanib, Ukrinform agentligi xabar berdi.

Manba maʼlumotlariga koʻra, shifokorlar Qodirovning ahvoli yaxshilanishi boʻyicha ijobiy prognoz bermayapti. Aytilishicha, u hozirda oʻzining shaxsiy shifoxonasida davolanmoqda. Soʻnggi kunlarda uning huzuriga yaqin oila aʼzolari, shuningdek, xorijda istiqomat qiladigan qarindoshlari kelgan.

Kremlda faol muhokamalar

Ukraina razvedkasi maʼlum qilishicha, Qodirovning sogʻligʻi bilan bogʻliq holatlar Moskvada ham jiddiy muhokamalarga sabab boʻlgan. Xususan, Kremlga yaqin doiralarda Checheniston rahbarligini kim qoʻlga olishi mumkinligi haqida maslahatlar kuchaygan.

Maʼlumotlarga koʻra, ehtimoliy nomzodlar sifatida Checheniston parlamenti raisi Magomed Daudov, «Axmat» maxsus boʻlinmasi qoʻmondoni Apti Alaudinov hamda Ramzan Qodirovning toʻngʻich oʻgʻli — Axmat Qodirov koʻrib chiqilmoqda.

Axmat Qodirovning tezkor koʻtarilishi

Ayni paytda 20 yoshda boʻlgan Axmat Qodirov Checheniston hukumati raisi oʻrinbosari vazifasini bajaruvchi etib tayinlangan. Shu bilan birga, u respublika sport vaziri lavozimini ham saqlab qolgan.

Bundan tashqari, u Grozniy shahrining faxriy fuqarosi unvoniga hamda Chechenistonning eng oliy mukofoti hisoblangan Axmat Qodirov ordeniga sazovor boʻlgan.

Tahlilchilarga koʻra, uning qisqa muddat ichida yuqori lavozimlarga koʻtarilishi ehtimoliy siyosiy vorislik ssenariysi bilan bogʻliq boʻlishi mumkin.