Яқин Шарқда “уруш ичидаги уруш”: прокси кучлар можарони кучайтирмоқда

The Wall Street Journal нашри таҳлилига кўра, Яқин Шарқдаги можаро янги босқичга ўтмоқда. Ҳозирги вазият оддий давлатлар ўртасидаги қарама-қаршиликдан чиқиб, “уруш ичидаги уруш” кўринишига келган.

Сўнгги ҳафталарда Саудия Арабистони ва бошқа Кўрфаз давлатларига қарши юзлаб дрон ҳужумлари амалга оширилган. Қайд этилишича, қарийб 1000 та ҳужумнинг ярми Ироқ ҳудудидан уюштирилган. Нишонлар орасида нафақат ҳарбий объектлар, балки энергетика инфратузилмалари ҳам бор.

Можаро географияси кенгайиб, ҳужумлар Кувайт, Баҳрайн ва дипломатик объектларга ҳам таъсир қилмоқда. Бу эса низо анъанавий фронт чизиғидан чиқиб, кўп марказли хавфсизлик инқирозига айланаётганини кўрсатади.

Асосий ролни прокси кучлар ўйнамоқда. Эрон қўллаб-қувватлаётган Ироқдаги шиа гуруҳлари — Катаиб Ҳизбуллоҳ ва Асаиб Аҳл ал-Ҳақ — катта ҳарбий ва молиявий ресурсларга эга бўлиб, минтақада мустақил таъсир ўтказаётган кучга айланган.

Таҳлилчиларга кўра, бу гуруҳлар орқали Эрон рақибларига билвосита зарба бермоқда. Шу билан бирга, Кўрфаз давлатлари жавоб чораларини тўғридан-тўғри эмас, балки Ироқ ҳудудида кўриш эҳтимоли юқори.

                                   

Мафтуна Бахтиёрова тайёрлади