Ўзбекистон Канн кинофестивалида 25 фоизли ребейт дастурини тақдим қилди

Франциянинг Канн шаҳрида ташкил этилган халқаро кинобозорда Ўзбекистон миллий павильони тўртинчи бор фаолият юритиб, мамлакатнинг кинотуризм салоҳияти, кинолокациялари ва хорижий фильмлар учун яратилаётган имкониятлар тақдим этилди.

Хорижий продюсерлар Ўзбекистонга қизиқмоқда

Миллий павильонга Европа, АҚШ, Канада, Австралия ва Осиё давлатларидан 100 дан ортиқ продакшн ҳамда дистрибуция компаниялари вакиллари ташриф буюрди.

Жумладан, Франциянинг Okino Films компанияси режиссёри Квентин Клосан Сурхондарё вилояти локацияларида илмий-фантастик фильм суратга олиш имкониятини кўриб чиқмоқда.

Шунингдек, италиялик ҳужжатли фильм муаллифлари Алессандро Белтраме ва Алессия Валенти Бойбулоқ қори ҳақида Amazon Prime платформаси учун фильм суратга олиш режасини билдирган.

Британия ва Япония продюсерлари ҳам қизиқиш билдирмоқда

Буюк Британиянинг Fact Not Fiction Films компанияси раҳбари Тристан Лорейн Ўзбекистонда авиация мавзусида фильм суратга олиш ғоясини тақдим қилди.

Япониялик продюсер Юсуке Камата эса Ўзбекистонни халқаро кино лойиҳалари учун истиқболли майдон сифатида баҳолади. У аввал Tokyo Vice ва Missing: The Lucy Blackman Case каби йирик лойиҳаларда иштирок этган.

Кинотуризм иқтисодиёт драйверига айланмоқда

Ребейт дастурлари киноиндустрияда инвестиция жалб қилишнинг муҳим воситасига айланган. Ҳозирда Германия, Чехия, Саудия Арабистони, Эстония ва Озарбайжон каби давлатлар йирик солиқ қайтимлари орқали кино ишлаб чиқарувчиларни жалб қилмоқда.

Ўзбекистон ҳам 2026 йилдан бошлаб Global Country Placement дастурини ишга тушириши орқали мамлакатни халқаро фильмлар орқали тарғиб қилишни мақсад қилган.

Бу тажриба аввал Янги Зеландия ва Мексикада катта самара берган. Хусусан, Spectre ва The Lord of the Rings фильмлари ушбу давлатларга туристлар оқимини сезиларли оширган.