Маҳаллийчилик қилиш навбати амалдорларга етдими?

Бугун ижтимоий тармоқларда Миллий тикланиш демократик партиясининг Тошкент шаҳар кенгаши раиси Отабек Жиянбаев депутатликка фақат тошкентлик, Тошкент шевасида тоза гапира оладиган номзодларни тасдиқлаш кераклиги ва вилоайтликларни “исқирт” деб ҳақорат қилгани айтилган аудиоси тарқалди. Унда депутатликка номзодларни танлашда "мафкура Тошкентники бўлсин, (бошқа) шевада гапирганларни яқинлаштирма, бухоролик бўлмасин, бухороликлар исқирт бўлади", деб кўрсатма берган. 

Шунингдек, Отабек Жиянбаев ўз мансаб ваколатини суистеъмол қилиб, пора беришни истамаган депутатларга ҳайфсан чиқаришини таъкидлаган. Ижтимоий тармоқларда ёзилишича, Отабек Жиянбаев ва ҳокимлик хўжалик бўлими бошлиғи ҳар бир депутатлик ўрнини 3000-5000 АҚШ долларига пулламоқда. 

Тошкент шаҳар кенгаши раиси Отабек Жиянбаевнинг аудиоси тарқалгач "Эзгулик" инсон ҳуқуқлари жамияти фаоли Абдураҳмон Ташанов ушбу ҳолатга нисбатан муносабат билдирди. 

"Қонун ишламаган жойда ғоя бир тийин... Тармоқларда "Миллий тикланиш" партиясининг Тошкент шаҳар бўлими лидери экани айтилаётган шахснинг маҳаллийчиликка оид аудиоси тарқалди. Одам ҳатто эшитишга-да уяладиган бундай жирканч сўзлар, афсуски, истеъмолга аллақачон кириб бўлган, энди айрим расмийлар тилига ҳам ўтди. 

Чунки бунда маҳаллийчилик ва шовинизм иллати илдизлари бизда аллақачон бор эди. Қонун ижроси масаласида импотенсия юзага келгач, иллат дарров ўзини кўрсатди (15 суткага кириб чиққан қизларни эсланг)", дейди у. 

Унинг айтишича, ҳозирда маҳаллийчилик бўйича қонунни кучайтиришга, бу инсидентни ҳам шовинизим, сепаратизм ва ирқий камситиш қаторига қўшиш ва Кодексларда жавобгарлик белгилашга эҳтиёж бор. 

"Миллий тикланиш"нинг маҳаллийчи мулозимига келадиган бўлсак, уни жавобгарликка тортиш тугул, унинг ҳаракатларига жавоб ҳам беришмаса керак. Чунки расмийларнинг жавоб бериш имконияти аллақачон барбод бўлди ва ўзларидан бетимнинг қаттиқлиги "жонимнинг ҳузури" режимини ёқиб олишган. 

Биз бугун қонунлар ижроси фалажлигига тўқнашдик ва бундай шароитда ислоҳот-у ғоялар ҳақида гап ҳам бўлиши мумкин эмас. Қонун жамиятнинг ўзига хос иммунитети экан, бугунги партиячининг сепаратизм туйғусига эрк беришини шу нуқтадан изламоқ керак”, деган фикрини якунлаган. 

Муаллиф: Машҳура Мансуровна