Mahalliychilik qilish navbati amaldorlarga yetdimi?

Bugun ijtimoiy tarmoqlarda Milliy tiklanish demokratik partiyasining Toshkent shahar kengashi raisi Otabek Jiyanbayev deputatlikka faqat toshkentlik, Toshkent shevasida toza gapira oladigan nomzodlarni tasdiqlash kerakligi va viloaytliklarni “isqirt” deb haqorat qilgani aytilgan audiosi tarqaldi. Unda deputatlikka nomzodlarni tanlashda "mafkura Toshkentniki boʻlsin, (boshqa) shevada gapirganlarni yaqinlashtirma, buxorolik boʻlmasin, buxoroliklar isqirt boʻladi", deb koʻrsatma bergan. 

Shuningdek, Otabek Jiyanbayev oʻz mansab vakolatini suisteʼmol qilib, pora berishni istamagan deputatlarga hayfsan chiqarishini taʼkidlagan. Ijtimoiy tarmoqlarda yozilishicha, Otabek Jiyanbayev va hokimlik xoʻjalik boʻlimi boshligʻi har bir deputatlik oʻrnini 3000-5000 AQSh dollariga pullamoqda. 

Toshkent shahar kengashi raisi Otabek Jiyanbayevning audiosi tarqalgach "Ezgulik" inson huquqlari jamiyati faoli Abdurahmon Tashanov ushbu holatga nisbatan munosabat bildirdi. 

"Qonun ishlamagan joyda gʻoya bir tiyin... Tarmoqlarda "Milliy tiklanish" partiyasining Toshkent shahar boʻlimi lideri ekani aytilayotgan shaxsning mahalliychilikka oid audiosi tarqaldi. Odam hatto eshitishga-da uyaladigan bunday jirkanch soʻzlar, afsuski, isteʼmolga allaqachon kirib boʻlgan, endi ayrim rasmiylar tiliga ham oʻtdi. 

Chunki bunda mahalliychilik va shovinizm illati ildizlari bizda allaqachon bor edi. Qonun ijrosi masalasida impotensiya yuzaga kelgach, illat darrov oʻzini koʻrsatdi (15 sutkaga kirib chiqqan qizlarni eslang)", deydi u. 

Uning aytishicha, hozirda mahalliychilik boʻyicha qonunni kuchaytirishga, bu insidentni ham shovinizim, separatizm va irqiy kamsitish qatoriga qoʻshish va Kodekslarda javobgarlik belgilashga ehtiyoj bor. 

"Milliy tiklanish"ning mahalliychi mulozimiga keladigan boʻlsak, uni javobgarlikka tortish tugul, uning harakatlariga javob ham berishmasa kerak. Chunki rasmiylarning javob berish imkoniyati allaqachon barbod boʻldi va oʻzlaridan betimning qattiqligi "jonimning huzuri" rejimini yoqib olishgan. 

Biz bugun qonunlar ijrosi falajligiga toʻqnashdik va bunday sharoitda islohot-u gʻoyalar haqida gap ham boʻlishi mumkin emas. Qonun jamiyatning oʻziga xos immuniteti ekan, bugungi partiyachining separatizm tuygʻusiga erk berishini shu nuqtadan izlamoq kerak”, degan fikrini yakunlagan. 

Muallif: Mashhura Mansurovna