Мен шахсан 15 май куни Путинни Истанбулда кутаман — Зеленский

Зеленский бу ҳақда ўзининг Тelegram-каналида ёзиб, "Пайшанба куни Туркияда Путинни кутаман. Шахсан. Умид қиламанки, бу сафар россияликлар яна баҳона қидирмайди", дея таъкидлаган. 

Шунингдек, президент бугун, 12 майдан бошлаб тўлиқ ўт очишни тўхтатиш кераклигини қайд этган. "Қон тўкилишини чўзишнинг фойдаси йўқ", деди у. Бироқ, Киев илгари талаб қилганидек, Москва камида 30 кунлик сулҳ эълон қилиши керакми-йўқми, бу борада Зеленский ўзининг сўнгги баёнотида аниқлик киритмади. 

Бундан бироз олдин эса, АҚШ президенти Дональд Трамп Россия президентини 15 майдаги Истанбулдаги бевосита музокараларга зудлик билан рози бўлишга чақирди. 

Трампнинг фикрича, бу учрашув давомида "битим тузиш имконияти борми-йўқми" деган саволга жавоб олиши мумкин бўлади. Агар имкон бўлмаса, Европа ва АҚШ етакчилари вазиятнинг қайси босқичда эканини аниқ билиб, шунга мос равишда ҳаракат қилaди. 

Аввалроқ Украина ва унинг Европадаги иттифоқчилари, жумладан Германия ва Франция 30 кунлик сулҳни музокаралар учун мажбурий шарт сифатида белгилаб, Путиннинг олдиндан шартларсиз 15 май куни Туркияда тўғридан-тўғри музокара ўтказиш таклифига шундай жавоб қайтарган эди.