Нетаньяҳу Францияни “экстремистик ислом босқини”га учраганликда айблади

20 октябрь куни Исроил бош вазири Биньямин Нетаньяҳу иқтисодий аҳволга қарши ўтказилган норозилик намойишлари тартибсизликларга айланиб кетганидан сўнг, Францияни “экстремистик ислом босқини”га учраганликда айблади.

Ушбу баёнотлар Ғарб дунёсидаги ўта ўнгчи сиёсатчилар ва шарҳловчиларнинг риторикасига ҳамоҳанг бўлди. Улар иммиграция туфайли Европанинг айрим қисмлари, жумладан, Британия ҳам ислом анъаналари таъсирида қолгани ҳақида асоссиз даъволар қилиб келишади.

Ўнг қанот вакили бўлган бош вазир ўз интервьюсида Франция етакчилари тартибсизликларга тайёргарлик кўра олмагани ҳақида гапирди. У Париж ва бошқа йирик шаҳарларда кўчаларга чиққан намойишчилар турли қатламларга мансуб бўлганига қарамай, ғалаёнларни экстремист мусулмонлар авж олдирганини иддао қилди.

“Улар ўз вақтида тайёргарлик кўрмай, шунчаки қўл силтаб қўйишди. Улар экстремистик ислом босқинига бўйин эгишди”, — деган Нетаньяҳу.

Францияга қандай маслаҳат берган бўлардингиз, деган саволга жавобан: “Ён бериш сиёсатини юритманг, экстремистларга қарши курашинг”, деб жавоб берган Исроил бош вазири.

Шунингдек, у ҲАМАСнинг 2023 йил 7 октябрдаги ҳужумидан сўнг Франция президенти Эммануэль Макронга “агар биз уларни бу ерда йўқ қилмасак, улар Парижда пайдо бўлади”, деб айтганини қўшимча қилди.

Франция ўтган йили Фаластин давлатчилигини тан олиб, Исроилни норози қилган бир қатор Европа мамлакатларидан бири бўлган эди.

Трамп ҳам иммиграцияни айблади

АҚШ президенти Дональд Трамп Франциядаги норозилик намойишларидан фойдаланиб, бунда иммиграцияни айблади ҳамда Европа ва Макронни чегара назоратини кучайтиришга чақирди.

“Францияда бўлаётган воқеаларнинг на мактабларга, на бошқа бирор нарсага алоқаси бор, буларнинг бари иммиграция билан боғлиқ. Гап иммиграцияда ва мен президент Эммануэль Макронга чегараларни ёпишни айтдим”, — деди Трамп журналистларга.

Трамп ноқонуний иммиграцияга қарши курашни 2024 йилги сайловолди кампаниясининг асосий ваъдасига айлантирганди.