Pepsi 2026 йил учун фойда прогнозини пасайтирди

Pepsi 2026 молиявий йилида валюта курслари таъсири ҳисобга олинмаган ҳолда акция бошига тўғри келадиган асосий фойда 1–2 фоизга ўсишини кутмоқда. Аввалги прогнозда бу кўрсаткич 4–6 фоизга ошиши кутилган эди.

Компания шу билан бирга йиллик органик даромад тахминан 3 фоизга ўсишини прогноз қилмоқда. Аввалги прогноз 2–4 фоиз оралиғида эди.

Шимолий Америкада талаб пасаймоқда

Pepsi учун асосий муаммолардан бири Шимолий Америка бозори бўлиб қолмоқда. Компаниянинг озиқ-овқат йўналишида учинчи чоракда савдо ҳажми деярли ўзгармаган, ичимликлар сегментида эса ҳажм йиллик ҳисобда 2 фоизга камайган.

Компания аввалроқ Lay’s ва Doritos каби маҳсулотлар нархини пасайтириш орқали талабни рағбатлантиришга уринган эди. Бироқ юқори маркетинг харажатлари, инфляция ва ишлаб чиқариш қийматининг ошиши компания маржасига босим ўтказмоқда.
Pepsi раҳбарияти Шимолий Америкада ўсиш ва операцион маржани яхшилаш бўйича ишлар кутилганидан кўпроқ вақт олаётганини тан олди.

Компания харажатларни қисқартиради

Pepsi бош директори Рамон Лагуарта компания қўшимча таркибий харажатларни қисқартириш чораларини ишлаб чиқишини маълум қилди.

Бу маблағлар органик даромад ўсишини тезлаштиришга қаратилган инвестицияларни молиялаштириш ҳамда инфляция туфайли ортиб бораётган харажатларни қоплашга йўналтирилади.
Компания шунингдек автоматлаштириш, рақамлаштириш ва бизнес жараёнларини соддалаштириш орқали самарадорликни оширишга эътибор қаратмоқда.

Даромад кутилганидан юқори бўлди

Шу билан бирга, Pepsi’нинг учинчи чорак натижалари бозор прогнозларидан яхшироқ чиқди.
Компаниянинг чораклик даромади 5,6 фоизга ошиб, 25,27 миллиард долларни ташкил этди. Бу таҳлилчилар кутган 24,96 миллиард доллардан юқори.

Компаниянинг чораклик асосий акция бошига фойдаси 2,34 доллар бўлиб, таҳлилчиларнинг 2,29 долларлик прогнозидан ошди.
Шу сабабли компания акциялари хабар эълон қилинганидан кейин биржа олди савдоларида тахминан 1 фоизга қимматлаган.

Нима учун бу муҳим?

PepsiCo мисоли истеъмол товарлари ишлаб чиқарувчи йирик компаниялар дуч келаётган умумий муаммони кўрсатмоқда. Хомашё ва энергия харажатларининг ошиши фойда маржасини қисқартираётган бир вақтда, истеъмолчилар юқори нархлар туфайли арзонроқ маҳсулотларга ўтмоқда.

Шунинг учун Pepsi учун асосий вазифа нафақат сотув ҳажмини ошириш, балки харажатларни назорат қилиш ва Шимолий Америкада истеъмолчилар талабини қайта тиклашдан иборат бўлиб қолмоқда.

Муаллиф: Ҳасанбой ОЧУН