Германияда Z авлод намойишлари: ёшлар ҳукуматдан нимани талаб қилмоқда?

31 октябрь куни Германиянинг Франкфурт шаҳридаги дўконлар юзларини ниқоб билан беркитган тартибсизлик иштирокчилари томонидан талон-торож қилинди. Бу воқеа Германиянинг йирик шаҳарларида ўн минглаб намойишчилар таълим сифатини яхшилаш ва яшаш харажатларини камайтириш талаби билан кўчаларга чиққанидан кейин юз берди.

Намойишлар жорий йилда Европа бўйлаб Z авлод етакчилигида ўтказилган норозилик ҳаракатлари тўлқинини давом эттирди. Сербияда талабалар бошчилигидаги фаоллик сайловлар орқали мамлакатнинг узоқ йиллик етакчисини ҳокимиятдан кетишга мажбур қилди. Франциядаги ғалаёнлар эса тартибсизликлар ва талон-торожларга айланиб кетди.

Германиядаги намойишларни «Gen Z regelt» («Z авлоди масъулиятни ўз зиммасига олади») ҳаракат гуруҳи ташкил этди. Улар Берлин, Франкфурт ва Мюнхен каби 34 та шаҳарда бўлиб ўтди. Ҳаракат мажбурий ҳарбий хизматга қарши чиқиб, таълим соҳасига кўпроқ маблағ ажратилишини талаб қилган. Чунки Германиядаги кўплаб ёшлар яшаш харажатлари ошиб бораётгани сабабли молиявий қийинчиликларга дуч келмоқда.

Германиянинг молиявий маркази ҳисобланган Франкфуртда намойишлар зўравонликка айланиб кетди. Reuters нашрининг хабар беришича, полиция вазиятни назоратга олишга уринса-да, камида иккита дўкон талон-торож қилинган, яна бир нечта савдо нуқталарига зарар етказилган.

Расмий маълумотларга кўра, намойишчилар сони ташкилотчилар кутган 182 минг кишига етмаган. Франкфурт, Мюнхен ва Берлин полицияси митингларда жами 18 мингча одам қатнашганини билдирди. Аммо ташкилотчиларнинг веб-сайтида қарийб 36 минг киши кўрсатилган.

Германия расмийлари шанба кунги намойишлар Hellouin байрами тадбирлари билан бир вақтга тўғри келганига қарамай, тинч ўтганини маълум қилди. Шунингдек, экстремистик гуруҳлар ушбу ҳаракатдан ўз мақсадлари йўлида фойдаланиши мумкинлигидан ҳам огоҳлантирди.

Гамбург шаҳрида эса айрим баррикадаларга ўт қўйилган.

«Бугун бу ерга уруш ва зўравонлик эмас, балки тинчлик ҳамда эркинлик учун курашиш мақсадида йиғилдик. Биз учун энг муҳими – соғлиқни сақлаш ва таълим тизимларини янада кўпроқ қўллаб-қувватлашдир. Биз мажбурий ҳарбий хизматга қаршимиз ва масъулият юкининг адолатлироқ тақсимланиши тарафдоримиз», – деди «Gen Z regelt» ташкилоти матбуот котиби Лина Фридрих.

Федерал ички ишлар вазирлигининг маълум беришича, Германиядаги ўта сўл экстремистик доираларнинг айрим бўлимлари ҳамда хорижий экстремистик ҳаракатларга алоқадор баъзи гуруҳлар тарафдорларни сафарбар этиш мақсадида бирлашган.

«Франциядаги ўша манзаралар – талончиликлар, ёнаётган уй ва полиция машиналари ҳамда полиция ходимларига қилинган ҳужумлар барчамизнинг кўз ўнгимизда турибди. Бу борада Франциядан асло ўрнак олмаслик керак», – деди Франкфурт шаҳри жойлашган Гессен федерал ери ички ишлар вазири Роман Позек.

Намойиш ташкилотчилари эътиборини қаратган асосий жиҳат – Европанинг энг гигант иқтисодиётида ёш авлод зиммасига тушаётган босим тобора ортаётгани.

«Ҳукумат бизнинг хавотирларимизга жавобан қисқартиришларни давом эттириш ва зиммамизга янада кўп оғирлик юклашдан бошқа ҳеч нарса таклиф қилмади. Бизни эътиборсиз қолдиришдан тўхтамас экансиз, йиғилишлар ўтказиш бўйича асосий ҳуқуқимиздан фойдаланаверамиз», – деди Мюнхендаги митингда нутқ сўзлаши кутилаётган 18 ёшли Стив канцлер Фридрих Мерсга мурожаат қилар экан.

Иқтисодий муаммолар

Германия иқтисодий ўсишни тиклашга қийналмоқда. Шунингдек, «беби-бумерлар» авлоди нафақага чиқаётгани ва меҳнатга лаёқатли аҳоли сони қисқараётгани сабабли мамлакатда пенсия тизими ва давлат хизматларига тушаётган босим ортган.

Ҳаракатни ким бошқаряпти, у чинданам ёшлар ташаббуси билан ташкил этилдими каби саволлар ҳам диққат марказида.

Германиянинг BSK миллий мактаб ўқувчилари ташкилотлари уюшмаси ўзини ушбу ташаббусдан четга олди ва 20 ноябрь куни алоҳида норозилик намойиши ўтказишни режалаштирмоқда.